جے ایس گلوبل نے ہفتہ کو اپنی ایک رپورٹ میں کہا ہے کہ پاکستان میں افراط زر کی سست روی کا رجحان ستمبر میں بھی جاری رہنے کا امکان ہے اور یہ تقریبا چار سال کی کم ترین سطح پر آنے کا امکان ہے۔
بروکریج ہاؤس نے کہا کہ گزشتہ سال کی بلند قیمتوں سے سازگار بنیادی اثرات کی بنیاد پر ’افراط زر کے سال‘ سے گزرتے ہوئے، پاکستان کا سی پی آئی (کنزیومر پرائس انڈیکس) تقریبا 7.5 فیصد کے قریب رہنے کی توقع ہے، جو تقریبا 4 سال (جنوری 2021 کے بعد سے) کی کم ترین سطح ہے۔
پاکستان میں افراط زر خاص طور پر حالیہ برسوں میں ایک اہم اور مستقل معاشی چیلنج رہا ہے۔ گزشتہ سال مئی میں سی پی آئی افراط زر کی شرح 38 فیصد کی ریکارڈ بلند ترین سطح پر پہنچ گئی تھی۔ تاہم، اس کے بعد سے یہ مسلسل کم ہو رہی ہے۔
اگست 2024 میں سالانہ بنیاد پر پاکستان کی سی پی آئی ریڈنگ 9.6 فیصد رہی، جو جولائی 2024 کے مقابلے میں کم ہے جب یہ 11.1 فیصد تھی۔
ادارہ شماریات کے مطابق 3 سال بعد افراط زر کی شرح ایک بار پھر سنگل ڈیجٹ میں آگئی ہے۔
دریں اثنا، بروکریج ہاؤس نے سی پی آئی افراط زر کو ”مارچ-2025 تک ممکنہ طور پر 6 فیصد (حقیقی شرح سود: 550 بی پی ایس) پر نیچے آنے کی پیش گوئی کی ہے“۔
رپورٹ میں مزید کہا گیا کہ اس کے بعد جون 2025 تک سی پی آئی ریڈنگ 12 فیصد تک بڑھ سکتی ہے (حقیقی شرح سود: 1150 بی پی ایس) جو بعد میں معمول پر آ کر تقریبا 10.5 فیصد ہو جائے گی۔
جے ایس گلوبل نے ان تخمینوں کی وجہ تیل کی مستحکم قیمتوں اور روپے کی قدر میں بتدریج کمی کو قرار دیا۔
اس میں کہا گیا ہے کہ دونوں میں سے کسی ایک یا دونوں میں کوئی بھی سازگار رجحان سی پی آئی کی رفتار کو مزید کم کرے گا۔
پالیسی ریٹ میں مزید کٹوتی
بروکریج ہاؤس نے کہا کہ افراط زر میں کمی کا رجحان مانیٹری پالیسی کمیٹی کی نومبر میں ہونے والے اجلاس میں شرح سود میں مزید کمی کی دلیل کی حمایت کرتا ہے۔
شرح سود میں مسلسل چوتھی بار کمی نومبر 2024 میں متوقع ہے جس سے پالیسی ریٹ کم ہو کر 16 فیصد رہ جائے گا۔
اسٹیٹ بینک کی ایم پی سی نے اپنے گزشتہ اجلاس میں اپریل 2020 کے بعد کلیدی پالیسی ریٹ میں سب سے جارحانہ کمی کا اعلان کیا تھا، جس میں 200 بی پی ایس کی کمی کی گئی تھی تاکہ افراط زر میں کمی اور بین الاقوامی سطح پر تیل کی قیمتوں میں کمی کے باعث اسے 17.5 فیصد تک لایا جاسکے۔