پاکستان اسٹاک ایکسچینج (پی ایس ایکس) میں پیر کے روز اتار چڑھاؤ کا رجحان رہا اور اس کے بینچ مارک کے ایس ای 100 انڈیکس میں دن کا اختتام 230 پوائنٹس کی کمی کے ساتھ ہوا۔
کے ایس ای 100 انڈیکس نے کاروبار کا آغاز مثبت انداز میں کیا اور کاروبار کے دوران 79 ہزار 160.40 کی بلند ترین سطح پر پہنچ گیا۔
تاہم، آج کے سیشن میں جب بھی انڈیکس 79,000 کو عبور کرتا، بیئرز (نچلی قیمت پر فروخت کرنے والے سرمایہ کار) نے انڈیکس کو واپس نیچے دھکیل دیا۔
اختتام پر بنچ مارک انڈیکس 230.37 پوائنٹس یا 0.29 فیصد کی کمی سے 78,571.06 پر بند ہوا۔
بروکریج ہاؤس اسماعیل اقبال سیکیورٹیز نے اپنی پوسٹ مارکیٹ رپورٹ میں کہا کہ ایکویٹی مارکیٹ آج منفی نوٹ پر بند ہوئی، بنچ مارک انڈیکس پورے سیشن کے دوران اتار چڑھاؤ کا شکار رہا۔
جمعہ کے روز بھی پی ایس ایکس میں اتار چڑھاؤ دیکھنے میں آیا اور کے ایس ای 100 اتار چڑھاؤ کے بعد بند ہوا۔
حب پاور ہولڈنگز لمیٹڈ (ایچ پی ایچ ایل) نے پاکستان میں معدنی کانوں کی تلاش اور ترقی کے لئے کان کنی کی کمپنی آرک میٹلز (پرائیویٹ) لمیٹڈ کے ساتھ جوائنٹ وینچر معاہدہ کیا ہے۔
ایچ پی ایچ ایل کی پیرنٹ کمپنی حبکو نے پیر کے روز پی ایس ایکس کو ایک نوٹس میں اس پیش رفت سے آگاہ کیا۔
پاکستان کی سب سے بڑی انڈیپنڈنٹ پاور پروڈیوسر (آئی پی پی) حب پاور کمپنی لمیٹڈ (حبکو) کا منافع 30 جون کو ختم ہونے والے مالی سال 24-2023 میں 21 فیصد سے زائد اضافے کے ساتھ 75.29 ارب روپے رہا۔
اسٹاک ایکسچینج کو بھیجے گئے نوٹس کے مطابق گزشتہ سال کے اسی عرصے میں کمپنی نے مجموعی بنیادوں پر 62 ارب روپے کا منافع کمایا تھا۔
شیل پیٹرولیم کمپنی لمیٹڈ کے ماتحت ادارے شیل پاکستان لمیٹڈ (ایس پی ایل) نے 30 جون 2024 کو ختم ہونے والے تین ماہ کے عرصے میں 1.13 ارب روپے کے منافع کا اعلان کیا ہے۔
پیر کو جاری ہونے والی اپریل تا جون سہ ماہی کے نتائج گزشتہ سال کے اسی عرصے میں رپورٹ کیے گئے 8.3 ارب روپے کے منافع سے کہیں زیادہ ہیں، جو سالانہ 86 فیصد سے زیادہ کی کمی ہے۔
امریکی فیڈرل ریزرو کے سربراہ جیروم پاول نے گزشتہ ہفتے اعلان کیا تھا کہ مرکزی بینک شرح سود میں کمی کے لیے تیار ہے جس کے بعد پیر کے روز یورو زون کی اسٹاک مارکیٹس میں تیزی دیکھی گئی۔
پیرس سی اے سی 40 0.2 فیصد اضافے کے ساتھ 7,589.50 پوائنٹس جبکہ فرینکفرٹ ڈی اے ایکس 0.3 فیصد کمی کے ساتھ 18,578.25 پوائنٹس پر بند ہوا۔
لندن ایف ٹی ایس ای 100 انڈیکس تعطیلات کے باعث بند تھا۔
پیر کے روز مین لینڈ چین کے حصص کی قیمتوں میں گراوٹ دیکھی گئی جبکہ ہانگ کانگ میں فیڈرل ریزرو کے چیئرمین جیروم پاول کی جانب سے دنیا کی سب سے بڑی معیشت میں شرح سود میں کٹوتی کی تجویز کے بعد علاقائی شراکت داروں کی قدر میں اضافہ دیکھنے میں آیا۔
دریں اثنا پیر کے روز انٹر بینک مارکیٹ میں امریکی ڈالر کے مقابلے میں پاکستانی روپے کی قدر میں 0.03 فیصد اضافہ ریکارڈ کیا گیا۔ اختتام پر امریکی ڈالر کے مقابلے میں روپیہ 0.08 روپے کے اضافے سے 278.42 روپے پر بند ہوا۔
آل شیئر انڈیکس پر حجم جمعہ کے روز 682.41 ملین سے کم ہوکر 512.34 ملین رہ گیا۔
حصص کی قیمت گزشتہ سیشن کے 18.17 ارب روپے سے معمولی اضافے کے ساتھ 18.89 ارب روپے ہوگئی۔
سممیٹری گروپ لمیٹڈ 59.37 ملین حصص کے ساتھ سب سے آگے رہا، اس کے بعد کوہ نور اسپننگ 50.62 ملین حصص کے ساتھ اور ورلڈ کال ٹیلی کام 24.44 ملین حصص کے ساتھ تیسرے نمبر پر رہا۔
پیر کو 433 کمپنیوں کے حصص کا کاروبار ہوا جن میں سے 150 کمپنیوں کے حصص کی قیمتوں میں اضافہ، 242 میں کمی جبکہ 41 میں استحکام رہا۔