پاکستان مسلم لیگ (ن) کے صدر اور سابق وزیر اعظم نواز شریف نے اعلان کیا ہے کہ پنجاب حکومت اگست اور ستمبر کے لیے ماہانہ 500 یونٹ سے کم استعمال کرنے والے صارفین کے لیے بجلی کے ٹیرف میں 14 روپے فی یونٹ کمی کرنے جا رہی ہے۔
ان خیالات کا اظہار انہوں نے لاہور میں اپنی صاحبزادی اور وزیراعلیٰ پنجاب مریم نواز کے ہمراہ میڈیا سے گفتگو کرتے ہوئے کیا۔
نواز شریف نے بجلی کے نرخوں میں اضافے اور بڑھتی ہوئی مہنگائی پر افسوس کا اظہار کرتے ہوئے کہا کہ یہ عمران خان کی قیادت والی پی ٹی آئی حکومت تھی جس نے بین الاقوامی مالیاتی فنڈ (آئی ایم ایف) کے ساتھ غلط معاہدے کیے جس کی وجہ سے یہ صورتحال پیدا ہوئی۔
مسلم لیگ (ن) کے صدر نے کہا کہ انہیں عوام کی مشکلات کا ادراک ہے لہٰذا انہوں نے پنجاب حکومت کو اس سلسلے میں کوششیں کرنے کی ہدایت کی ہے۔
نواز شریف نے کہا کہ مریم نواز عوام کو فوری ریلیف فراہم کرنے کے لیے انتھک محنت کر رہی ہیں جس پر وہ مبارکباد کی مستحق ہیں۔
انہوں نے کہا کہ حلف اٹھانے کے چند روز بعد مریم نواز نے آٹے کی قیمتوں میں کمی کی جس سے صوبے میں روٹی کی قیمتوں میں کمی آئی، اب انہوں نے عوام کو بجلی کے بلوں میں بڑے پیمانے پر ریلیف فراہم کرنے کے لئے اپنے سرکاری اخراجات میں کمی کی ہے۔
سابق وزیراعظم نے صوبے میں مستحق خاندانوں کو مفت سولر پینل فراہم کرنے کے لیے 700 ارب روپے کے پیکج کا بھی اعلان کیا۔
پریس کانفرنس کے آغاز پر مسلم لیگ (ن) کے سربراہ نے پی ٹی آئی حکومت کو تنقید کا نشانہ بناتے ہوئے کہا کہ ان کی برطرفی کے بعد ملک کو مہنگائی اور بے روزگاری کی دلدل میں دھکیل دیا گیا ہے۔
انہوں نے کہا کہ میری حکومت بغیر کسی وجہ کے گرائی گئی تھی، ہم نے خود ہی ملک کو دلدل میں دھکیلا۔ انہوں نے کہا کہ اگر ہمارے دور کی ترقی اور پالیسی جاری رہی رہتی تو آج ملک کی معیشت اس حالت میں نہ ہوتی۔
گزشتہ ماہ وزیر اعظم شہباز شریف نے 200 یونٹ سے کم بجلی استعمال کرنے والے کم آمدنی والے گھرانوں کے لیے 50 ارب روپے کے توانائی سبسڈی پیکج کا اعلان کیا تھا۔
پریس کانفرنس سے خطاب کرتے ہوئے وفاقی وزیر پیٹرولیم مصدق ملک نے کہا کہ 86 فیصد گھرانوں نے 200 یونٹ سے کم بجلی استعمال کی۔
انہوں نے کہا کہ اس لیے وزیر اعظم نے ان گھرانوں کے لیے گزشتہ سال کے بجلی کے نرخ برقرار رکھے۔
31 جولائی کو وزیر اعظم شہباز شریف نے بجلی کے بلوں کی ادائیگی میں 10 دن کی توسیع کا حکم دیا تھا۔
پاور ڈویژن کا کہنا ہے کہ توسیع کا اطلاق جولائی اور اگست 2024 کے بجلی بلوں کی مقررہ تاریخوں پر ہوگا جس سے صارفین کو اپنی ادائیگیوں کا انتظام کرنے کے لیے اضافی وقت ملے گا۔