اٹک ریفائنری لمیٹڈ اور اٹک جنرل لمیٹڈ کے چیف ایگزیکٹو آفیسر (سی ای او) عادل خٹک نے پیٹرولیم مصنوعات کی قیمتوں کو مرحلہ وار ڈی ریگولیٹ کرنے کا مطالبہ کیا ہے۔

گزشتہ 47 سال سے اٹک آئل گروپ سے وابستہ عادل خٹک نے بی آر ریسرچ کو دیے گئے ایک انٹرویو میں کہا کہ میں ڈی ریگولیشن کے لیے مرحلہ وار طریقہ کار اپنانے کی سفارش کرتا ہوں۔

ڈی ریگولیشن کے بارے میں اپنے نقطہ نظر کی وضاحت کرتے ہوئے سی ای او نے کہا کہ پہلے مرحلے میں سالانہ آڈٹ کے ذریعے بدعنوانیوں کی نشاندہی شامل ہونی چاہئے۔

انہوں نے مزید کہا کہ دوسرے مرحلے میں ان لینڈ فریٹ ایکوالائزیشن مارجن (آئی ایف ای ایم) کو قیمتوں کے ڈھانچے سے ڈی ریگولیٹ کرنا ہوگا تاکہ ٹیکس ریفنڈ، جعلی مصنوعات اور ڈمپنگ سے متعلق مسائل حل کیے جاسکیں۔

آئی ایف ای ایم ایک پولنگ میکانزم ہے جو 2001 میں ملک بھر میں پیٹرولیم مصنوعات کی یکساں قیمتوں کو یقینی بنانے کے لئے متعارف کرایا گیا تھا۔

انہوں نے کہا کہ یہ سیاسی مضمرات کی وجہ سے صنعت کے اندر ایک متنازعہ مسئلہ بن گیا ہے، وقتاً فوقتاً حکام آئی ایف ای ایم کے ڈی ریگولیشن پر تبادلہ خیال کرتے ہیں اور یہ بات چیت حال ہی میں دوبارہ سامنے آئی ہے۔

عادل خٹک نے کہا کہ آئی ایف ای ایم کو ڈی ریگولیٹ کرنے کے نتیجے میں مختلف شہروں اور تیل کمپنیوں کے درمیان قیمتوں میں نمایاں فرق ہوگا۔ انہوں نے کہا کہ بندرگاہوں اور ریفائنریوں کے قریب صارفین سستے نرخوں سے فائدہ اٹھائیں گے جبکہ مزید فیلڈز کو زیادہ قیمتوں کا سامنا کرنا پڑے گا۔

عادل خٹک نے نشاندہی کی کہ گزشتہ برسوں کے دوران صنعت نے فریٹ پول میکانزم میں ہیرا پھیری اور غلط استعمال کا مشاہدہ کیا ہے۔ انہوں نے کہا کہ اس میں کم معیار کی اسمگل شدہ مصنوعات متعارف کروا کر ایندھن کے معیار پر سمجھوتہ کرنا، کم قیمت اسمگل شدہ مصنوعات کی دستیابی کی وجہ سے خوردہ فروشوں کو اضافی رعایت دینا اور غیر قانونی ڈمپنگ اور دیگر او ایم سی اسٹیشنز یا غیر قانونی اسٹوریج تنصیبات کو اضافی ترسیل شامل ہے۔

انہوں نے کہا کہ اس کے علاوہ ریفائنریز کو پیٹرولیم مصنوعات کی قیمتوں کو ڈی ریگولیٹ کرنے کے حوالے سے مخصوص خدشات ہیں۔

عادل خٹک نے بتایا کہ موٹر گیسولین (ایم جی) اور ہائی اسپیڈ ڈیزل (ایچ ایس ڈی) جیسی پی او ایل مصنوعات کی قیمتوں کا ڈھانچہ چھ مختلف اجزاء پر مشتمل ہے جس میں ایکس ریفائنری، پیٹرولیم لیوی اور سیلز ٹیکس، آئی ایف ای ایم، ڈسٹری بیوشن مارجن (او ایم سیز) اور ڈیلر مارجن شامل ہیں۔

انہوں نے کہا کہ ہم پٹرول اور ڈیزل پر 10 فیصد کسٹم ڈیوٹی قبول کر سکتے ہیں لیکن ہمیں ڈمپنگ سے بچنا چاہیے۔

انہوں نے کہا کہ پیٹرولیم رولز کے مطابق او ایم سیز کو پہلے مقامی ذرائع سے خریداری کرنا ہوتی ہے اور صرف وہ مقدار درآمد کرنی ہوتی ہے جو طلب کو پورا کرنے کے لیے ناکافی ہوں۔ یہ تحفظ مقامی صنعت کو غیر منصفانہ مسابقت سے بچانے اور اس کی پائیداری کو یقینی بنانے کے لئے ضروری ہے۔

حکومت کئی سالوں سے ایندھن کی قیمتوں کو ڈی ریگولیٹ کرنے کے خیال پر عمل پیرا ہے جس کا ابتدائی ہدف یکم نومبر 2022 ہے۔

تاہم، وسیع پیمانے پر مخالفت اور صارفین، خاص طور پر معاشرے کے سب سے کمزور طبقوں پر ممکنہ منفی اثرات کے بارے میں خدشات کی وجہ سے اس منصوبے کو روک دیا گیا تھا۔

جون میں آئل مارکیٹنگ ایسوسی ایشن آف پاکستان (او ایم اے پی) نے خصوصی سرمایہ کاری سہولت کونسل سیکریٹریٹ (ایس آئی ایف سی) سے رابطہ کیا تھا تاکہ کمپنیوں کو آئی ایف ای ایم کی رکاوٹ سے بچایا جاسکے۔

او ایم اے پی نے اپنے خط میں کہا ہے کہ او ایم سیز کو اپنے کیش فلو میں خلل کا سامنا کرنا پڑ رہا ہے کیونکہ فنڈز آئی ایف ای ایم میں رکھے گئے ہیں۔ آئی ایف ای ایم آڈٹ میں تاخیر کی وجہ سے موصول ہونے والے فنڈز کی قدر میں نمایاں کمی دیکھی گئی ہے جو آٹھ سال کی مدت تک جاری رہی۔

خط میں کہا گیا ہے کہ یہ چیلنجز پوری صنعت کو متاثر کر رہے ہیں اور اس کے نتیجے میں ان پھنسے ہوئے فنڈز پر بہت زیادہ سودی لاگت آرہی ہے۔