اینگرو فرٹیلائزر لمیٹڈ (ای ایف ای آر ٹی) نے 30 جون 2024 کو ختم ہونے والی دوسری سہ ماہی کے دوران 1.66 ارب روپے کا بعد از ٹیکس منافع حاصل کیا جو گزشتہ سال کے اسی عرصے کے 1.06 ارب روپے کے مقابلے میں 57 فیصد زیادہ ہے۔ ایسا بدھ کو پاکستان اسٹاک ایکسچینج (پی ایس ایکس) میں کمپنی کے مجموعی مالیاتی نتائج میں ظاہر کیا گیا ہے۔

مالی سال 2024 کی دوسری سہ ماہی میں فی حصص آمدنی (ای پی ایس) 1.25 روپے رہی جبکہ گزشتہ سال کے اسی عرصے میں 0.79 روپے کی ای پی ایس ریکارڈ کی گئی تھی۔

جے ایس گلوبل نے اپنے نوٹس میں کہا کہ مالی سال 2024 کی دوسری سہ ماہی کے لئے توقع سے کم نتائج کم مارجن کے علاوہ زیادہ مالی اخراجات کی وجہ سے بھی ہیں۔

اینگرو فرٹیلائزر لمیٹڈ کے بورڈ آف ڈائریکٹرز (بی او ڈی) نے 30 جون کو منعقدہ اپنی میٹنگ میں دوسری سہ ماہی کے لئے 3 روپے فی حصص یعنی 30 فیصد کے حساب سے عبوری نقد منافع کا بھی اعلان کیا۔ یہ عبوری نقد منافع کے علاوہ ہے جو پہلے ہی 8 روپے فی حصص یعنی 80 فیصد پر ادا کیا جا چکا ہے۔

مجموعی بنیادوں پر اینگرو فرٹیلائزرز کی آمدنی مالی سال 2024 کی دوسری سہ ماہی میں تقریبا 3 فیصد اضافے کے ساتھ 39.42 ارب روپے رہی جو مالی سال 2023 کی دوسری سہ ماہی میں 38.38 ارب روپے تھی۔

تاہم آمدنی میں اضافے کے باوجود فرٹیلائزر مینوفیکچررز کا مجموعی منافع 38 فیصد کم ہوکر 11.42 ارب روپے کے مقابلے میں 7.13 ارب روپے رہ گیا۔ اس کی وجہ مالی سال 2024 کی دوسری سہ ماہی کے دوران فروخت کی لاگت میں سالانہ 20 فیصد اضافہ ہے۔

نتیجتا مالی سال 2024 کی دوسری سہ ماہی میں منافع کا مارجن کم ہو کر 18.1 فیصد رہ گیا جو گزشتہ سال کے 29.8 فیصد سے کم ہے۔

مالی سال 24 کی دوسری سہ ماہی میں اینگرو فرٹیلائزر لمیٹڈ کے سود کے اخراجات 74 فیصد اضافے کے ساتھ 1.2 ارب روپے تک پہنچ گئے جو گزشتہ سال کے اسی عرصے میں 702 ملین روپے تھے۔ فنانس کی لاگت میں اضافے کو اس مدت کے دوران شرح سود میں اضافے سے منسوب کیا جاسکتا ہے۔

نتیجتا کمپنی نے مالی سال 2024 کی دوسری سہ ماہی میں 2.56 ارب روپے کا قبل از ٹیکس منافع (پی بی ٹی) حاصل کیا جو 64 فیصد کم ہے۔

مالی سال 2024 کی دوسری سہ ماہی کے دوران کمپنی نے 893 ملین روپے ٹیکس ادا کیا جو گزشتہ سال کے اسی عرصے میں 6.06 ارب روپے کے مقابلے میں بہت کم ہے۔