پاکستان کے سب سے بڑے سیمنٹ مینوفیکچررز میں سے ایک ڈی جی خان سیمنٹ نے امریکہ میں اپنی ملکیت میں ذیلی کمپنی قائم کرنے کا اعلان کیا ہے۔
سیمنٹ بنانے والی کمپنی نے جمعہ کو پاکستان اسٹاک ایکسچینج (پی ایس ایکس) کو اپنے نوٹس میں اس پیش رفت سے آگاہ کیا۔
نوٹس میں کہا گیا ہے کہ ڈی جی خان سیمنٹ کمپنی لمیٹڈ کے بورڈ آف ڈائریکٹرز نے انتظامیہ کو ”ڈی جی سیمنٹ یو ایس اے ایل ایل سی“ کے مجوزہ نام کے تحت ہیوسٹن، ٹیکساس، ریاستہائے متحدہ امریکہ (یو ایس اے) میں کمپنی کی مکمل ملکیت میں ماتحت ادارہ قائم کرنے کا موقع تلاش کرنے کی منظوری دے دی ہے۔
کمپنی نے مزید کہا کہ یہ پیشرفت پاکستان اور امریکہ کے قوانین کے تحت تمام قابل اطلاق ضابطوں کی منظوریوں سے مشروط ہے۔
اس سال کے شروع میں، ڈی جی کے سی نے بتایا کہ کمپنی ہر سال 600,000 ٹن ”لو الکلی“ سیمنٹ امریکہ کو برآمد کرے گی جس سے ملک کے لیے تقریباً 360 ملین ڈالر حاصل ہوں گے۔
ایگزیکٹو ڈائریکٹر ڈی جی کے سی فرید فضل نے اس وقت کہا تھا کہ کمپنی لندن، فرانس اور جرمنی کے خریداروں سے بات چیت کر رہی ہے اور جلد ہی کمپنی سی ای سرٹیفکیشن حاصل کرنے کے بعد یورپی مارکیٹ میں داخل ہو جائے گی۔
انہوں نے کہا تھا کہ ہمارے پاس اضافی سیمنٹ ہے اور چونکہ رسد طلب سے کہیں زیادہ ہے اس لیے مینوفیکچررز اپنی پوری صلاحیت استعمال نہیں کر رہے ہیں اور ہمیں نئی منڈیاں تلاش کرنے کی ضرورت ہے۔
انہوں نے مزید کہا کہ ملک کو اپنی برآمدات کو امریکہ جیسی بڑی مارکیٹوں تک بڑھانے کی ضرورت ہے کیونکہ امریکہ میں تعمیراتی مواد کی طلب میں کئی گنا اضافہ ہوا ہے اور خریدار رسد کے نئے ذرائع تلاش کر رہے ہیں۔
تاہم اقتصادی سروے 2023-24 میں انکشاف ہوا ہے کہ پاکستان کی سیمنٹ انڈسٹری کی صلاحیت کے استعمال میں بتدریج کمی آئی ہے اور یہ مالی سال 24 (جولائی تا اپریل) کے دوران 54.64 فیصد رہی جو ریکارڈ کی کم ترین سطح ہے۔
پاکستان کی سیمنٹ انڈسٹری کی مجموعی پیداواری صلاحیت 82.25 ملین ٹن ہے لیکن رواں مالی سال کے 10 ماہ کے دوران مقامی ترسیل اور برآمدات صرف 37.45 ملین ٹن رہی ہیں۔
واضح رہے کہ ڈی جی کے سی پاکستان کے سب سے بڑے مینوفیکچررز میں سے ایک ہے جس کی یومیہ پیداواری صلاحیت 25 ہزار ٹن سیمنٹ (7.500 ملین ٹن سالانہ) ہے۔
ڈی جی کے سی کے تین سیمنٹ پلانٹس دورا غازی خان، کلر کہار اور حب میں واقع ہیں۔
گزشتہ ماہ کنفیکشنری آئٹمز بنانے والی کمپنی اسماعیل انڈسٹریز لمیٹڈ نے متحدہ عرب امارات کے شہر ابوظہبی میں اپنا ماتحت ادارہ قائم کرنے کے منصوبے کا اعلان کیا تھا۔