ایران کے نومنتخب صدر مسعود پیزشکیان نے کہا کہ وہ یورپی ممالک کے ساتھ تعلقات میں بہتری کے منتظر ہیں۔ اگرچہ انہوں نے یورپ پر امریکی پابندیوں کے اثرات کو کم کرنے کے وعدوں سے مکرنے کا الزام لگایا۔
پیزشکیان 6 جولائی کو انتہائی قدامت پسند سعید جلیلی کے خلاف صدارتی انتخابات کے آخری مرحلے میں کامیاب ہوئے تھے۔
69 سالہ صدر نے ایران کو تنہائی سے نکالنے کے لیے مغربی ممالک کے ساتھ ”تعمیری تعلقات“ پر زور دیا ہے جبکہ ایران اور عالمی طاقتوں کے درمیان 2015 کے جوہری معاہدے کی بحالی کے حامی ہیں۔
واشنگٹن نے یکطرفہ طور پر 2018 میں معاہدے سے علیحدگی اختیار کی، پابندیاں دوبارہ عائد کیں اور ایران کو بتدریج اپنی شرائط سے پر عملدرآمد کم کرنے پر مجبور کیا۔ اس معاہدے کا مقصد جوہری سرگرمیوں کو روکنا ہے جسے تہران پرامن مقاصد کیلئے برقرار رکھنا چاہتا ہے۔
انگریزی زبان کے تہران ٹائمز اخبار میں جمعہ کو اپنی تحریر میں پیزشکیان نے کہا کہ 2015 کے معاہدے سے امریکی دستبرداری کے بعد یورپی ممالک نے اسے بچانے اور امریکی پابندیوں کے اثرات کو کم کرنے کی کوشش کرنے کا عہد کیا۔
انہوں نے لکھا کہ یورپی ممالک ان تمام وعدوں سے مکر گئے ہیں۔
انہوں نے لکھا کہ ان غلطیوں کے باوجود میں باہمی احترام اور برابری کے اصولوں کی بنیاد پر اپنے تعلقات کو درست راستے پر گامزن کرنے کے لیے یورپی ممالک کے ساتھ تعمیری بات چیت کا منتظر ہوں۔
یورپی یونین کی ترجمان نبیلہ مسرالی نے اس سے قبل پیزشکیان کو ان کے انتخاب پر مبارکباد دی تھی۔ انہوں نے مزید کہا کہ 27 رکنی بلاک یورپی یونین کی اہم مصروفیت کی پالیسی کے مطابق نئی حکومت کے ساتھ مصروفیات شروع کرنے کے لیے تیار ہے۔
پیزشکیان ایک ہارٹ سرجن ہیں جن کا حکومتی امور چلانے کا تجربہ تقریباً دو دہائیاں قبل وزیر صحت کے طور پر تھا۔
انتہائی سخت گیر صدر ابراہیم رئیسی کی ہیلی کاپٹر حادثے میں موت کے بعد انتخابات کی ضرورت پڑی جو 2025 تک نہیں ہونے تھے۔
پیزشکیان کو ایران میں ”اصلاح پسند“ سمجھا جاتا ہے اور وہ اس کیمپ سے واحد امیدوار تھے جنہیں انتخابات میں کھڑے ہونے کی اجازت دی گئی تھی جس کے لیے تمام دعویداروں کو ایران کی گارڈین کونسل نے منظوری دی تھی۔
ایران کے سپریم لیڈر آیت اللہ علی خامنہ ای ملک کے تمام اہم پالیسی امور پر حتمی رائے رکھتے ہیں۔
سنہ 2015 میں طے پانے والے اس معاہدے کے تحت ایران نے اپنا جوہری پروگرام منجمد کرنے پر رضامندی ظاہر کی تھی جس کے بدلے میں اس پر عائد بین الاقوامی پابندیاں اٹھا لی گئی تھیں۔
امریکی انخلا اور پابندیوں کے دوبارہ نفاذ کے بعد ایران نے آہستہ آہستہ معاہدے کے اپنے وعدوں سے انکار کرنا شروع کر دیا۔
ایران کے ساتھ 2015 کے معاہدے کے فریقوں نے اسے اسلامی جمہوریہ کو جوہری بم بنانے سے روکنے کا بہترین طریقہ سمجھا جس کا تہران ہمیشہ انکار کرتا رہا ہے۔
برطانیہ، چین اور روس کے ساتھ یورپی یونین کے ارکان فرانس اور جرمنی بھی اس معاہدے کے فریق تھے۔
یورپی ممالک نے اسے بچانے کی کوشش کی لیکن ایران نے ان پر غیر فعال ہونے کا الزام لگایا تھا۔