آذربائیجان کے صدر الہام علیوف وزیر اعظم شہباز شریف کی دعوت پر 11 جولائی کو پاکستان کے دو روزہ سرکاری دورے پر اسلام آباد پہنچیں گے۔

دفتر خارجہ کی پریس ریلیز کے مطابق صدر علیوف دورے کے دوران صدر آصف علی زرداری اور وزیر اعظم شہباز شریف سے ملاقاتیں کریں گے۔

بیان میں کہا گیا ہے کہ دونوں ممالک کے حکومتی سربراہان دو طرفہ تعاون کو مزید مضبوط بنانے کے لیے باہمی دلچسپی کے شعبوں پر وسیع پیمانے پر بات چیت کریں گے۔

بیان میں مزید کہا گیا ہے کہ اس دورے کے دوران کئی معاہدوں اور مفاہمتی یادداشتوں پر دستخط کیے جانے کی امید ہے۔

گزشتہ ہفتے آذربائیجان کے نائب وزیر خارجہ سمیر شریفوف پاکستان پہنچے تھے اور مختلف وزراء بشمول توانائی (بجلی و پٹرولیم) کے وزراء سے ملاقاتیں کیں اور وفاقی وزیر تجارت جام کمال خان سے ملاقات کی۔

وزیر جام کمال خان نے دیگر ممالک کے ساتھ مضبوط اقتصادی تعلقات قائم کرنے کے لیے پاکستانی حکومت کے عزم کو اجاگر کیا۔ انہوں نے اس بات پر زور دیا کہ گزشتہ تین ماہ کے دوران حکومت نے سفارتی اور اقتصادی تعلقات کو بڑھانے میں نمایاں پیش رفت کی ہے۔

جام کمال نے کہا کہ پاکستان آذربائیجان کے ساتھ اپنے تعلقات کو بہت اہمیت دیتا ہے۔ ہمیں سیاحت، ٹرانسپورٹ، توانائی کی حفاظت اور دفاع سمیت مختلف شعبوں میں اپنا تعاون جاری رکھنا چاہیے اور اس کے لیے اضافی کوششوں کی ضرورت ہے۔

انہوں نے پرفریشنل ٹریڈ ایگریمنٹ (پی ٹی اے) اور بائلیٹرل ٹرانزٹ ٹریڈ ایگریمنٹ (بی ٹی ٹی اے) کو جلد از جلد مکمل کرنے کی ضرورت پر بھی زور دیا۔

نائب وزیر شریفوف نے آذربائیجان کی پاکستان کے ساتھ باہمی دلچسپی کے تمام شعبوں میں قریبی تعاون کے لیے آمادگی سے آگاہ کیا۔

وزیر جام نے بزنس ٹو بزنس اجلاس منعقد کرنے کی تجویز بھی دی جو پاکستان یا آذربائیجان میں ہو سکتی ہیں۔ دونوں فریقوں نے دوطرفہ تجارت اور تعاون کو بڑھانے اور اس کی نگرانی کے لیے ایک طویل مدتی اور عملی میکانزم کی ضرورت پر اتفاق کیا تاکہ مطلوبہ مقصد کے حصول کے لیے آگے بڑھنے کے طریقے تجویز کیے جاسکیں۔

شریفوف نے دونوں ممالک کے درمیان سفر کی آسانی کو اجاگر کرتے ہوئے کہا کہ آذربائیجان نے اپنی ویزا پالیسی کی وجہ سے گزشتہ سال 55,000 پاکستانی زائرین کا ”استقبال“ کیا تھا۔

انہوں نے یہ بھی بتایا کہ آذربائیجان وسطی ایشیا کا پہلا ملک ہے جس نے پاکستان کے لیے براہ راست پروازیں شروع کیں جس سے زیادہ رابطے کی سہولت میسر آئی۔

30 مئی کو دونوں ممالک کے وزرائے خارجہ نے دونوں ممالک کے درمیان دوطرفہ اسٹریٹجک تعلقات کو مزید مضبوط بنانے کے لیے مضبوط عزم کا اظہار کیا۔

ایکس پر ایک بیان میں دفتر خارجہ نے کہا کہ آذربائیجان کے وزیر خارجہ جیہون بیراموف نے اسلام آباد میں نائب وزیراعظم اور وزیر خارجہ اسحاق ڈار سے ملاقات کی۔

دفتر خارجہ نے کہا کہ انہوں نے دو طرفہ تعلقات پر پیش رفت کا جائزہ لیا اور علاقائی اور عالمی پیش رفت پر تبادلہ خیال کیا۔

بعد ازاں مشترکہ نیوز کانفرنس سے خطاب کرتے ہوئے وزیر خارجہ اسحاق ڈار نے کہا کہ دونوں ممالک دو طرفہ خاص طور پر توانائی کے شعبے میں سرمایہ کاری کو بڑھانے کے لیے اقدامات کر رہے ہیں۔

اس موقع پر وزیر خارجہ اسحاق ڈار نے کہا کہ دونوں ممالک پارلیمانی تبادلوں کو بھی فروغ دیں گے، ثقافتی تعاون کو مضبوط کریں گے اور طلباء، ماہرین تعلیم، تاجروں، سیاحوں اور عوام کے درمیان رابطوں کو فروغ دیں گے۔

اپنے ریمارکس میں آذربائیجان کے وزیر خارجہ نے کہا کہ جموں و کشمیر کے تنازع پر ان کے ملک کے موقف نے اقوام متحدہ کی سلامتی کونسل کی متعلقہ قراردادوں کے مطابق تنازعہ کے پرامن حل کی مسلسل حمایت کی ہے۔

انہوں نے تجارت اور معیشت کے شعبوں میں دونوں ممالک کے درمیان تعاون کے فروغ کے لیے موجود امکانات کو بھی اجاگر کیا۔