وزیر اعظم شہباز شریف کی 23 ارب روپے کی ”فوری“ گرانٹ نے آزاد کشمیر میں آگ بجھا دی ہے، لیکن یہ فرض کرنا بے وقوفی ہوگی کہ وادی میں عدم اطمینان کو ختم کرنے کے لئے یہ سب کچھ کافی ہے۔

اس سے قطع نظر، سب سے پہلا سبق یہ ہے کہ حکومت نے سڑکوں پر صورتحال خراب ہونے سے پہلے بحرانوں سے نمٹنا ابھی تک نہیں سیکھا ہے۔ یا حکومت نے کبھی پرواہ نہیں کی اور پھر جب بھی صورتحال قابو سے باہر ہوجاتی ہیں تو صرف یہاں اور وہاں فنڈز دینے کی زحمت اٹھاتی ہے۔

یہاں تک کہ مسلم لیگ (ن) کے سینئر رہنما رانا ثناء اللہ نے بھی خود احتسابی کے ایک نادر لمحے میں اعتراف کیا کہ آزاد جموں و کشمیر کے مسائل، بڑھتی ہوئی مہنگائی ،غیر منصفانہ ٹیکس، بھدی اور کاسہ لیس اشرافیہ ایک طویل عرصے سے بھڑک رہے تھے اور انہیں بہت پہلے حل کیا جانا چاہئے تھا۔

دوسرا سب سے اہم سبق، کم از کم حکومت کے لیے، یہ ہے کہ کیا ہو سکتا ہے جب لوگوں کو طویل عرصے تک ریکارڈ افراط زر اور بے روزگاری برداشت کرنے پر مجبور کیا جائے، جبکہ ان کی آمدنی جمود کا شکار ہو یا حقیقی معنوں میں گر رہی ہو، اور حد سے زیادہ مراعات یافتہ اشرافیہ کو تمام وسائل کھانے اور ان پر حاکم ہونے کی اجازت دی جائے۔

ایسا نہیں ہے کہ حکومت ان مسائل کو نظر انداز کر رہی ہے بلکہ یہ دراصل اس مسئلے کا حصہ ہے کیونکہ یہ فوڈ چین کی اشرافیہ کے مفادات کے مطابق پالیسیاں وضع کرتی ہے اور یقینی طور پر جس کی قیمت نچلا طبقہ ادا کرتا ہے،جس کے نتیجے میں ریاست کا نوآبادیاتی ڈھانچہ پھلتا پھولتا ہے۔ جس کا سائز ہی اس بات کی ضمانت دیتا ہے کہ عام لوگوں کو اس کی قیمت ادا کرنے کے لیے استحصال کا سامنا کرنا پڑے گا۔

لہٰذا، یہ خدشہ ہے کہ مستقبل ماضی کے مقابلے میں کہیں زیادہ سخت چیلنجز لا سکتا ہے۔ عوام اب سمجھ چکے ہیں کہ صرف واحد چیز جو پاکستان کو ڈیفالٹ ہونے سے بچا سکتی ہے وہ آئی ایم ایف کا فعال پروگرام ہے، جو ایک بہت سخت ٹیکس اور سبسڈی کا نظام نافذ کرے گا، جو ہمیشہ کی طرح، متوسط اور کم آمدنی والے طبقے کو نقصان پہنچائے گا کیونکہ حکومت نے ابھی تک بڑی مچھلیوں زراعت ، رئیل اسٹیٹ ، ہول سیل ، ریٹیل پر ٹیکس لگانے کی ہمت نہیں کی ہے تاکہ مناسب مالی گنجائش پیدا کی جاسکے۔

تو اگلے مالی سال میں کیا توقع کی جائے گی، جب حکومت آئی ایم ایف کے ساتھ ایک اور ای ایف ایف پر دستخط کرنے کا جشن منائے گی جس کی ”پیشگی شرائط“ یوٹیلیٹی بلوں میں اضافہ کریں گی، مہنگائی کو بڑھا دیں گی اور ملک بھر میں مزید لاکھوں لوگوں کی زندگی ناقابل برداشت ہو جائے گی؟

اور چونکہ ہم اس وقت آئی ایم ایف کے پروگرام میں شامل ہوں گے، تو کیا ہوگا اگر وزیر اعظم کو احتجاج کو سنبھالنے کے لیے فنڈز فراہم کرنے کی اجازت نہیں دی جاتی ہے؟ گزشتہ چند دنوں میں آزاد کشمیر میں جو کچھ ہوا وہ اس بات کی غمگین علامت ہے کہ اگر حکومت نے فوری اصلاحات نہ کیں تو ملک بھر میں کیا ہونے والا ہے۔

یہ شرمناک ہے کہ ایسے اقدامات اٹھانے میں کم از کم چار ہلاکتیں اور کئی زخمی ہوئے جو بہت پہلے اٹھائے جانے چاہیے تھے۔ لیکن اس سے بھی بدتر بات یہ ہے کہ حکومت اب بھی اس طوفان سے بے خبر دکھائی دیتی ہے جو سب کی آنکھوں کے سامنے جمع ہو رہا ہے۔

یہ پوری طرح سے ایک ڈراؤنے خواب کے درمیان سوتے ہوئے چل رہے ہیں اور پورے ملک کو اپنے ساتھ گھسیٹ رہے ہیں ۔ اگر وہ واقعی یہ سوچتے ہیں کہ آزاد کشمیر کا احتجاج ایک الگ تھلگ اور ایک وقتی معاملہ تھا تو پھر لوگوں کو اس سے بھی زیادہ مصائب کا سامنا کرنا ہوگا ۔

کاپی رائٹ بزنس ریکارڈر، 2024