وزیر اطلاعات و نشریات عطاء اللہ تارڑ نے کہا ہے کہ آزاد جموں و کشمیر کے عوام کے مطالبات کو بروقت پورا کرکے بھارت اور ملک کے اندر سے کچھ انتشار پسند عناصر کے مذموم عزائم کو ناکام بنا دیا گیا ہے۔

وزیر امور کشمیر و گلگت بلتستان امیر مقام کے ہمراہ پارلیمنٹ ہاؤس کے باہر پریس کانفرنس سے خطاب کرتے ہوئے انہوں نے کہا کہ آٹے اور بجلی پر سبسڈی کے حوالے سے مطالبات کا حل حکومت کی جانب سے موثر فیصلہ سازی کی ایک مثال ہے۔

انہوں نے کہا کہ کسی کو بھی آزاد کشمیر میں افراتفری پھیلانے کی اجازت نہیں دی جائے گی، کشمیر پاکستان کی شہ رگ ہے اور پاکستان نے بھارت کے ناجائز قبضے کا معاملہ ہر فورم پر اٹھایا ہے۔

انہوں نے احتجاج کے دوران شہید ہونے والے پولیس اہلکاروں کے سوگوار خاندان سے ہمدردی کا اظہار کیا اور کہا کہ حکومت ان کے اہل خانہ کی مدد کرے گی۔

ملک کی معاشی صورتحال کے بارے میں عطا تارڑ نے کہا کہ ہماری کوششوں کے ثمرات مل رہے ہیں کیونکہ معاشی اشاریوں میں افراط زر میں کمی اور سرمایہ کاری میں اضافے کے ساتھ بہتری دکھائی دے رہی ہے۔

انہوں نے کہا کہ عالمی رپورٹس پاکستان کی معیشت کے لئے مثبت سمت کا اشارہ دے رہی ہیں۔

امیر مقام نے مسئلہ حل کرنے کے لیے بروقت مداخلت پر وزیراعظم شہباز شریف اور صدر آصف علی زرداری کا شکریہ ادا کیا۔

انہوں نے مزید کہا کہ ایسے عناصر تھے جو اس صورتحال کو اپنے مفادات کے لئے استعمال کرنا چاہتے تھے اور ان کا کشمیری عوام کی شکایات سے کوئی لینا دینا نہیں تھا۔

انہوں نے کہا کہ قیمتوں کے مسئلے کا پرامن حل ایسے عناصر کی شکست اور پاکستان اور کشمیر کی فتح ہے۔

کاپی رائٹ بزنس ریکارڈر، 2024