کراچی ایئرپورٹ پر فلائٹ آپریشن بحال

کراچی کے جناح انٹرنیشنل ایئرپورٹ پر فلائٹ آپریشنز بحال کر دیے گئے ہیں، پاکستان ایئرپورٹس اتھارٹی (پی اے اے) نے جمعرات کی شب ایک بیان میں تصدیق کی۔

بیان میں کہا گیا کہ کراچی کے جناح انٹرنیشنل ایئرپورٹ پر فلائٹ آپریشنز فوری طور پر بحال کر دیے گئے ہیں۔

اتھارٹی نے مزید کہا کہ ملک کے تمام بڑے ایئرپورٹس پر فلائٹ آپریشنز جاری ہیں۔

قبل ازیں، کراچی ایئرپورٹ پر فلائٹ آپریشنز رات 12 بجے تک معطل رکھنے کا اعلان کیا گیا تھا۔

پی اے اے نے اپنے ابتدائی بیان میں کہا تھا کہ آپریشنل وجوہات کی بنا پر کراچی ایئرپورٹ پر فلائٹ آپریشنز آج رات 12 بجے تک معطل رہیں گے۔

پہلے مرحلے میں کراچی، لاہور اور سیالکوٹ ایئرپورٹس پر فلائٹ آپریشنز دوپہر تک معطل کیے گئے تھے، جنہیں بعد میں رات 12 بجے تک توسیع دے دی گئی۔

پی اے اے نے مسافروں سے درخواست کی کہ وہ اپنی پروازوں کے بارے میں معلومات کے لیے اپنی ایئرلائن سے رابطے میں رہیں۔

دوسری جانب، پاکستان انٹرنیشنل ایئرلائنز (پی آئی اے) نے کہا کہ ملک میں موجودہ سیکیورٹی صورتحال کے باعث فضائی آپریشنز متاثر ہو رہے ہیں۔

احتیاطی تدابیر کے طور پر بعض فضائی راستوں کو عارضی طور پر محدود کیا جا رہا ہے تاکہ پروازوں کی حفاظت یقینی بنائی جا سکے، جس سے ان راستوں پر چلنے والی پروازوں پر اثر پڑ رہا ہے۔

بیان میں مزید کہا گیا کہ یہ عارضی بندش قومی ایئرلائنز کے اثاثوں اور مسافروں کی حفاظت کے پیشِ نظر کی جا رہی ہے۔

ایوی ایشن سیفٹی خدشات کے پیش نظر کراچی کے جناح ایئرپورٹ کے نزدیک لیزر لائٹس پر بھی پابندی عائد کر دی گئی ہے۔