جمعرات کو جاری کردہ ٹینڈر نوٹس کے مطابق پی ایل ایل نے ملکی گیس کی ضروریات پوری کرنے کے لیے یہ کارگوز طلب کیے ہیں۔

پہلا کارگو 14 سے 16 دسمبر 2026ء کے دوران جبکہ دوسرا کارگو 9 سے 11 جنوری 2027ء کے دوران فراہم کیا جائے گا۔

حکومت پاکستان کی ملکیت پی ایل ایل کو ملک کی گیس کی ضروریات پوری کرنے کے لیے ایل این جی کی خریداری کا اختیار حاصل ہے۔

سردیوں میں گیس کی طلب بڑھنے اور آبنائے ہرمز میں جاری رکاوٹوں کے باعث عالمی توانائی کی ترسیل متاثر ہونے کے خدشات کے پیش نظر پاکستان نے قطر کے ساتھ موجودہ طویل مدتی معاہدوں کے تحت رعایتی نرخوں پر مائع قدرتی گیس (ایل این جی) کے حصول کی کوششیں تیز کردی ہیں۔

یہ پیش رفت ایسے وقت سامنے آئی جب چند روز قبل پی ایل ایل نے دسمبر 2026ء اور جنوری 2027ء میں ترسیل کے لیے اسپاٹ بنیاد پر ایل این جی کے دو کارگوز کی بولیاں مسترد کردی تھیں۔

منگل کو پی ایل ایل کو دسمبر میں ایل این جی کی فراہمی کے لیے دو بولیاں موصول ہوئی تھیں۔ ٹوٹل انرجیز گیس اینڈ پاور لمیٹڈ نے 27.30 ڈالر فی ایم ایم بی ٹی یو جبکہ قطر انرجی ٹریڈنگ ایل ایل سی نے 31 ڈالر فی ایم ایم بی ٹی یو کی پیشکش کی تھی۔

اس مدت کے لیے ٹوٹل انرجیز گیس اینڈ پاور لمیٹڈ کو کم ترین جانچی گئی بولی دینے والا قرار دیا گیا تھا۔

جنوری 2027ء میں ترسیل کے لیے دوسرے کارگو کی بولی میں بھی ٹوٹل انرجیز گیس اینڈ پاور لمیٹڈ نے 24 ارب 28 کروڑ 16 لاکھ روپے، یا 27.1 ڈالر فی ایم ایم بی ٹی یو کی پیشکش کی تھی، جسے کم ترین جانچی گئی بولی قرار دیا گیا۔