متحدہ عرب امارات کی کمپنی دانہ گیس نے پیر کو بتایا کہ اتوار کو ہونے والے حملے کے نتیجے میں گیس فیلڈ میں آگ بھڑک اٹھی تھی، جسے بجھانے کے بعد نقصان کا تخمینہ لگایا جارہا ہے۔ کمپنی کے مطابق واقعے میں کوئی ملازم زخمی نہیں ہوا۔

علاقائی وزارت بجلی کے ذرائع کے مطابق ایک ڈرون نے ایل پی جی ذخیرہ کرنے والے ٹینک کو نشانہ بنایا، جس سے آگ لگ گئی۔ واقعے کے بعد فیلڈ میں موجود ملازمین کو حفاظتی پناہ گاہوں میں منتقل کردیا گیا۔

عراقی سکیورٹی ذرائع کے مطابق ابتدائی معلومات سے ظاہر ہوتا ہے کہ ڈرون تقریباً 80 کلومیٹر دور شہر طوز خورماتو کے مشرقی علاقوں سے داغا گیا تھا۔ جاری تحقیقات میں تاحال اس حملے کا ایران سے تعلق خارج از امکان قرار دیا گیا ہے۔

کردستان کی وزارت قدرتی وسائل اور وزارت بجلی نے مشترکہ بیان میں واقعے کو دہشت گردانہ حملہ قرار دیتے ہوئے کہا کہ اس کے اثرات کم کرنے کے لیے اقدامات کیے جارہے ہیں۔

خور مور گیس فیلڈ 2022 سے متعدد ڈرون حملوں اور پیداواری تعطل کا سامنا کرچکی ہے، جن کا کرد حکام نے مسلح ملیشیا گروپوں کو ذمہ دار ٹھہرایا ہے۔ تاہم اتوار کے حملے کی تاحال کسی گروپ نے ذمہ داری قبول نہیں کی۔