اردو اور پشتو زبانوں میں بنائی گئی اس دستاویزی فلم نے 28 اور 29 اکتوبر کو پہلی پوزیشن حاصل کی۔ فلم سازوں کی جانب سے جمعرات کے روز جاری کردہ بیان کے مطابق، ریلیز کے بعد سے یہ پیراماؤنٹ پلس پر سب سے زیادہ دیکھی جانے والی فلموں کی شمالی امریکا کی ٹاپ 10 فہرست میں مسلسل شامل ہے۔

ہالووین ویک اینڈ کے دوران فلم نے ’ڈریکولا‘، ’اسکیری مووی‘ اور ’رش آور‘ سمیت مقبول تجارتی فلموں کو پیچھے چھوڑ دیا۔ اس نے اٹلی میں بھی پیراماؤنٹ پلس پر پہلی پوزیشن حاصل کی۔

ایپل ٹی وی اسٹور پر بھی یہ دستاویزی فلم شمالی امریکا میں دستاویزی فلموں کی مقبول ترین فہرست میں ساتویں نمبر پر آگئی، جبکہ آسٹریلیا میں اسی زمرے کی فہرست میں دوسری پوزیشن حاصل کی۔

فلم کی کہانی محمد علی نقوی نے تحریر کی، جبکہ ہدایت کاری اور پروڈکشن کی ذمہ داریاں بھی انہوں نے ہی انجام دیں۔ بلال سامی نے اس کی مشترکہ کہانی نویسی اور پروڈکشن میں حصہ لیا۔ فلم میں خیبر پختونخوا کے ضلع بٹگرام میں 2023 کے اس ڈرامائی ریسکیو آپریشن کی داستان بیان کی گئی ہے، جس میں ایک گہری کھائی کے اوپر کیبل کار میں پھنسے آٹھ مسافروں کو بحفاظت نکالا گیا تھا۔

یہ پہلی دستاویزی فلم بھی ہے جسے پاکستان نے اکیڈمی ایوارڈز کے بہترین بین الاقوامی فیچر فلم کے زمرے میں اپنی نامزدگی کے لیے منتخب کیا ہے۔

محمد علی نقوی نے کہا، ’’جب میں نے ’ہینگنگ بائی اے وائر‘ بنانے کا فیصلہ کیا تو میری خواہش تھی کہ یہ فلم دستاویزی فلموں کے روایتی ناظرین سے کہیں آگے تک پہنچے۔‘‘

انہوں نے مزید کہا، ’’اس فلم کو ہالی ووڈ کی فلموں کے ساتھ مقبولیت کی فہرست میں دیکھنا ایک اہم سنگِ میل ہے۔ اردو اور پشتو میں بیان کی گئی ایک پاکستانی کہانی کا اتنی دور تک پہنچنا اور دنیا بھر میں ناظرین کی توجہ حاصل کرنا میرے لیے بہت معنی رکھتا ہے۔‘‘

یہ فلم ایور ونڈر اسٹوڈیو، یونیورسل پکچرز کنٹینٹ گروپ، مائنڈ ہاؤس پروڈکشنز اور 64تھ اسٹریٹ میڈیا کی مشترکہ پروڈکشن ہے۔

فلم کا پریمیئر 2026 کے سنڈینس فلم فیسٹیول میں ورلڈ سنیما ڈاکیومنٹری مقابلے کے زمرے میں ہوا تھا۔

اس کے بعد اس نے موزیک انٹرنیشنل ساؤتھ ایشین فلم فیسٹیول میں سنیما میں جرأت کے اعتراف میں سبین محمود ایوارڈ حاصل کیا۔ اس کے علاوہ اسے چیگرین ڈاکیومنٹری فلم فیسٹیول میں ڈیوڈ پونس بیسٹ آف دی فیسٹ ایوارڈ سے بھی نوازا گیا۔

محمد علی نقوی ایوارڈ یافتہ ہدایت کار، پروڈیوسر اور کہانی نویس ہیں۔ وہ اکیڈمی آف موشن پکچر آرٹس اینڈ سائنسز اور ٹیلی ویژن اکیڈمی کے رکن بھی ہیں۔

فلم کو پاکستان میں 2027 کے اوائل میں ریلیز کرنے کا منصوبہ ہے، تاہم اس کی تاریخ کا اعلان ابھی نہیں کیا گیا۔