آج نیوز کے مطابق چیف جسٹس امین الدین خان کی سربراہی میں دو رکنی بنچ نے صوبائی حکومت کی جانب سے پشاور ہائی کورٹ کے فیصلے کے خلاف دائر اپیل پر سماعت کی۔ صوبائی حکومت نے ہائی کورٹ کے اس حکم کو چیلنج کیا تھا جس میں انتظامیہ کو تھری ایم پی او کے تحت شہریوں کی گرفتاریوں سے روکا گیا تھا۔

سماعت کے دوران خیبر پختونخوا کے ایڈووکیٹ جنرل نے مؤقف اختیار کیا کہ ہائی کورٹ آئین کے آرٹیکل 199 کے تحت اس نوعیت کے اختیارات استعمال نہیں کرسکتی۔

اس پر بنچ کے رکن جسٹس عامر فاروق نے استفسار کیا کہ ہائی کورٹ میں روزانہ آرٹیکل 199 کے تحت متعدد مقدمات آتے ہیں، تو کیا عدالت عالیہ ان روزمرہ مقدمات کی سماعت بھی نہیں کرے گی؟

دورانِ سماعت فریقین کے وکیل شاہ فیصل الیاس نے استدعا کی کہ حکم امتناعی جاری کرنے سے پہلے ان کا مؤقف تفصیل سے سنا جائے۔

ان کا کہنا تھا کہ صوبائی حکومت کے تینوں اعتراضات قانونی طور پر برقرار نہیں رہ سکتے۔

چیف جسٹس امین الدین خان نے وکیل کو ہدایت کی کہ وہ عدالتی حکم نامے کا تفصیلی جائزہ لینے کے بعد اپنے قانونی اعتراضات اور جوابات جمع کرائیں۔ عدالت نے قرار دیا کہ دیگر فریقین بھی حکم نامہ دیکھنے کے بعد اپنی درخواستیں دائر کرسکتے ہیں۔

وفاقی آئینی عدالت کے حکم کے بعد تھری ایم پی او کے تحت گرفتاریوں سے متعلق پشاور ہائی کورٹ کے احکامات پر عمل درآمد فی الحال رک گیا ہے۔

عدالت نے فریقین کو نوٹسز جاری کرتے ہوئے مزید سماعت غیر معینہ مدت کے لیے ملتوی کردی، جبکہ آئندہ تاریخ بعد میں مقرر کی جائے گی۔