نئی رجسٹریشنز میں پرائیویٹ لمیٹڈ کمپنیوں کا حصہ 55.4 فیصد رہا جبکہ سنگل ممبر کمپنیوں کی شرح 41.6 فیصد تھی۔ باقی رجسٹریشنز میں 105 لمیٹڈ لائیبلٹی پارٹنرشپس، سیکشن 42 کے تحت 39 غیر منافع بخش کمپنیاں، چار پبلک کمپنیاں، دو غیر ملکی کمپنیاں اور ایک تجارتی تنظیم شامل تھی۔

پنجاب میں سب سے زیادہ 2,663 نئی کمپنیوں کی رجسٹریشن ہوئی، اس کے بعد اسلام آباد کیپیٹل ٹیریٹری میں 934 اور سندھ میں 751 کمپنیاں رجسٹرڈ ہوئیں۔ خیبر پختونخوا میں 382، گلگت بلتستان میں 162 اور بلوچستان میں 111 نئی کمپنیوں کی رجسٹریشن ریکارڈ کی گئی۔

کمپنیوں کی رجسٹریشن میں انفارمیشن ٹیکنالوجی کا شعبہ 991 نئی کمپنیوں کے ساتھ سرفہرست رہا، اس کے بعد ٹریڈنگ کے شعبے میں 767 اور سروسز کے شعبے میں 594 کمپنیاں رجسٹرڈ ہوئیں۔ دیگر نمایاں شعبوں میں تعمیرات کے شعبے میں 295، خوراک اور مشروبات میں 219، سیاحت میں 213، رئیل اسٹیٹ ڈویلپمنٹ اور ای کامرس میں 170، 170، تعلیم میں 152 اور ٹیکسٹائل کے شعبے میں 113 نئی کمپنیوں کی رجسٹریشن ہوئی۔ اس کے علاوہ دیگر شعبوں میں مزید 1,319 کمپنیاں رجسٹرڈ کی گئیں۔

غیر ملکی سرمایہ کاروں کی شمولیت

اکتوبر کے دوران نئی رجسٹرڈ ہونے والی کمپنیوں میں مجموعی طور پر 173 غیر ملکی سرمایہ کاروں نے سرمایہ کاری کی۔ ان میں چین کے سرمایہ کاروں کی تعداد 129 رہی جبکہ جرمنی سے 6، امریکا سے 5 اور برطانیہ سے 3 سرمایہ کار شامل تھے۔ ترکیہ، کینیڈا، برازیل، افغانستان، نائیجیریا، ہانگ کانگ، متحدہ عرب امارات اور نیدرلینڈز میں سے ہر ملک کے دو، جبکہ دیگر ممالک سے 14 سرمایہ کاروں نے حصہ لیا۔ مجموعی تعداد میں پانچ غیر ملکی کارپوریٹ ادارے بھی شامل تھے جبکہ باقی تمام سرمایہ کار انفرادی حیثیت سے شریک ہوئے۔