انہوں نے کہا کہ سپر ٹیکس کی شرح پہلے ہی 2 فیصد پوائنٹس کم کی جا چکی ہے جبکہ اسے بتدریج مکمل طور پر ختم کرنے کا ہدف مقرر کیا گیا ہے۔

کورنگی ایسوسی ایشن آف ٹریڈ اینڈ انڈسٹری (کاٹی) کے دورے کے موقع پر صنعت کاروں سے گفتگو کرتے ہوئے انہوں نے اعلان کیا کہ صنعت کاروں کو سہولت فراہم کرنے کے لیے کاٹی میں ایف بی آر کا ایک دفتر قائم کیا جائے گا۔ اس کے علاوہ ایف بی آر کے ہیلپ ڈیسک کا دائرۂ کار کراچی سے بڑھا کر سکھر تک وسیع کیا جائے گا۔

ایف بی آر کے چیئرمین نے مزید کہا کہ چمڑے کی صنعت کو سرحدی تجارت سے متعلق درپیش مسائل کے حل کے لیے اجلاس منعقد کیے جائیں گے۔ انہوں نے ادویہ سازی کی صنعت کے لیے ڈرگ ریگولیٹری اتھارٹی آف پاکستان (ڈریپ) سے مشابہ ایک نظام نافذ کرنے پر بھی تبادلۂ خیال کیا تاکہ ٹریک اینڈ ٹریس سسٹم کو مزید مؤثر بنایا جا سکے۔

انہوں نے کہا کہ ایف بی آر کا مقصد ٹیکس نظام کو بہتر بنانا اور کاروباری برادری کو سہولت فراہم کرنا ہے۔ انہوں نے صنعتکاروں اور ملک کی کاروباری برادری پر زور دیا کہ وہ ٹیکس چوری کی نشاندہی اور اس کے خاتمے کے لیے ایف بی آر کے ساتھ تعاون کریں، تاکہ ٹیکس نظام کو مزید شفاف اور مؤثر بنایا جا سکے۔

کاٹی کے صدر شیخ عمر ریحان نے معیشت کی بہتری اور صنعت کاروں کو درپیش مشکلات کے حل کے لیے ایف بی آر کے چیئرمین کو ہر ماہ کراچی کا دورہ کرنے کی ہدایت دینے پر وزیراعظم شہبازشریف کا شکریہ ادا کیا۔ انہوں نے کہا کہ اگر وفاقی کابینہ اور وزرا بھی ایف بی آر کے چیئرمین کی مثال پر عمل کرتے ہوئے کراچی کے مسائل کے حل کے لیے اپنا وقت دیں تو اس سے پاکستان کی معیشت کو مضبوط بنانے میں مدد ملے گی۔