آئی ایس پی آر کے مطابق یہ کارروائیاں یکم نومبر کو فتنہ الہندوستان اور فتنہ الخوارج سے تعلق رکھنے والے دہشت گردوں کی موجودگی کی اطلاعات پر کی گئیں۔

پہلی کارروائی ضلع کچھی کے علاقے سنی میں دہشت گردوں کی موجودگی سے متعلق خفیہ اطلاعات کی بنیاد پر کی گئی۔ سیکیورٹی فورسز نے سڑک پر رکاوٹ کھڑی کرنے کی دہشت گردوں کی کوشش ناکام بناتے ہوئے 10 بھارت کے سرپرستی یافتہ دہشت گردوں کو ہلاک کر دیا۔

آئی ایس پی آر کے مطابق ہلاک دہشت گردوں کے قبضے سے اسلحہ اور گولہ بارود بھی برآمد کیا گیا۔

دوسری کارروائی ضلع خاران میں کی گئی، جہاں سیکیورٹی فورسز نے دہشت گردوں کے ایک ٹھکانے پر چھاپہ مارا۔ اس دوران شدید فائرنگ کا تبادلہ ہوا، جس کے نتیجے میں بھارت کے سرپرستی یافتہ سات خوارج ہلاک ہو گئے۔

بیان کے مطابق کارروائی کے دوران ضلع کرک سے تعلق رکھنے والے 25 سالہ سپاہی حکمت اللہ نے بہادری سے لڑتے ہوئے جام شہادت نوش کیا۔

علاقے میں موجود دیگر بھارت کے سرپرستی یافتہ دہشت گردوں کے خاتمے کے لیے کلیئرنس آپریشن جاری ہیں۔

آئی ایس پی آر نے کہا کہ وفاقی ایپکس کمیٹی کی جانب سے منظور کردہ قومی ایکشن پلان کے تحت وژن ’’عزمِ استحکام‘‘ کے مطابق ملک سے بیرونی سرپرستی اور معاونت سے ہونے والی دہشت گردی کے خاتمے کے لیے انسداد دہشت گردی مہم پوری رفتار سے جاری رکھی جائے گی۔

دریں اثنا، صدر مملکت آصف علی زرداری نے دونوں کارروائیوں میں 17 دہشت گردوں کے خاتمے پر سیکیورٹی فورسز کو خراج تحسین پیش کیا اور ضلع کچھی میں سڑک پر رکاوٹ کھڑی کرنے کی کوشش ناکام بنانے کے لیے بروقت کارروائی کو سراہا۔

انہوں نے خاران میں دہشت گردوں کے ٹھکانے کو کامیابی سے نشانہ بنانے پر بھی فورسز کی تعریف کی اور کہا کہ ان کی پیشہ ورانہ مہارت اور تیاری نے دہشت گردوں کے مذموم عزائم ناکام بنا دیے۔

صدر مملکت نے سپاہی حکمت اللہ کی شہادت پر گہرے دکھ اور افسوس کا اظہار کرتے ہوئے ان کے اہل خانہ سے دلی تعزیت کی۔

انہوں نے کہا کہ ملک کے دفاع اور امن و سلامتی کے قیام کے لیے جوان کی قربانی ہمیشہ یاد رکھی جائے گی۔

صدر آصف زرداری نے شہید کے درجات کی بلندی اور اہل خانہ کے لیے صبر جمیل کی دعا بھی کی۔

انہوں نے اس عزم کا اعادہ کیا کہ بیرونی سرپرستی میں ہونے والی دہشت گردی کے مکمل خاتمے تک انسداد دہشت گردی کی کارروائیاں جاری رہیں گی۔ ان کا کہنا تھا کہ سیکیورٹی فورسز اور قانون نافذ کرنے والے اداروں کی قربانیاں اور مسلسل کوششیں قومی فخر کا باعث ہیں۔