بائنانس جس کے صارفین نے گزشتہ ہفتے ممکنہ طور پر تاریخ کی سب سے بڑی مالیاتی چوری کا نشانہ بننے کے بعد پیر تک مجموعی طور پر 4.72 ارب ڈالر کے خالص اثاثے نکال لیے تھے، نے رقوم کے مزید انخلا کو روکنے اور نئے صارفین کو راغب کرنے کے لیے ایک مہم بھی شروع کردی ہے۔

کرپٹو کرنسی ایکسچینج نے منگل کو سوشل میڈیا پلیٹ فارم ایکس پر جاری ایک بیان میں کہا کہ اس کے پلیٹ فارم پر ہر گھنٹے رقوم کے انخلا کے مقابلے میں زیادہ ڈپازٹس جمع ہو رہے ہیں۔ ان کا کہنا تھا کہ یہ صورتِ حال صارفین کی سرگرمیوں میں بہتری اور رقوم کے بہاؤ میں استحکام کی عکاسی کرتی ہے۔

ایف بی آئی نے ہفتے کے اختتام پر کہا تھا کہ 6 ارب ڈالر سے زائد مالیت کے کرپٹو اثاثوں کی چوری میں شمالی کوریا ملوث تھا، جس کے انکشاف نے کرپٹو انڈسٹری میں ہلچل مچا دی۔

سی این اے کی منگل کو جاری کردہ رپورٹ کے مطابق، شمالی کوریا کے رہنما کم جونگ اُن کی بہن کم یو جونگ نے کہا کہ امریکی الزامات ثابت کرتے ہیں کہ واشنگٹن اب بھی پیانگ یانگ کے خلاف دشمنانہ رویہ رکھتا ہے۔

پیانگ یانگ نے امریکی صدر ڈونلڈ ٹرمپ کی جانب سے رواں سال کے اوائل میں سربراہی اجلاسوں کے ذریعے سفارتی روابط بحال کرنے کی پیشکشوں کا کوئی جواب نہیں دیا۔ امریکی الزامات کے تناظر میں کم یو جونگ نے کہا کہ شمالی کوریا کو امریکا کی اس دشمنی کے حوالے سے اپنے مؤقف پر نظرثانی کرنے کے معاملات درپیش ہیں جس کا وہ واشنگٹن پر الزام عائد کرتی ہیں۔

کے سی این اے کے مطابق کم یو جونگ نے کہا کہ ایف بی آئی شمالی کوریا کو ایک سائبر جرائم پیشہ ریاست کے طور پر پیش کرنے کی کوشش کررہی ہے اور دعویٰ کررہی ہے کہ اسے ایسی معلومات ملی ہیں جن کے مطابق شمالی کوریا کی حمایت یافتہ ایک ہیکنگ تنظیم اس واقعے میں ملوث تھی۔

حکمران جماعت کی عہدیدار کم نے کہا کہ امریکا کا یہ دعویٰ مضحکہ خیز بیان بازی ہے اور اس میں کوئی نئی بات نہیں۔