گزشتہ ہفتے سعودی عرب، ترکیہ اور پاکستان کے اعلیٰ حکام نے تہران میں ایرانی حکام سے ملاقات کی تھی۔ اگست کے بعد ایران اور ان تینوں ممالک کے درمیان یہ پہلا اعلیٰ سطح کا رابطہ تھا۔

ایران کے خلاف امریکا اور اسرائیل کی جنگ فروری کے اواخر میں شروع ہوئی تھی، جس کے بعد لڑائی سعودی عرب اور یمن تک پھیل گئی۔

ریاض نے کہا تھا کہ اس دورے کا مقصد مذاکرات کے ایسے ذرائع کھولنا ہے جن کے ذریعے فوجی کشیدگی کی واپسی کو روکا جا سکے۔ یہ پیش رفت ایسے وقت ہوئی جب حالیہ ہفتوں میں سعودی عرب اور یمن کے حوثیوں کے درمیان لڑائی میں شدت آگئی تھی۔

حوثیوں کے حملوں میں اس وقت اضافہ ہوا جب طاقتور ملیشیا نے آبنائے باب المندب کی جانب پیش قدمی کی۔ یہ اہم بحری تجارتی گزرگاہ جزیرہ نما عرب کے دوسری جانب آبنائے ہرمز کے مقابل واقع ہے۔

حوثیوں نے سعودی تیل کی تنصیبات اور ہوائی اڈوں کو بھی نشانہ بنایا، جن میں ریاض کا بین الاقوامی ہوائی اڈہ بھی شامل ہے۔ ان حملوں کے باعث پروازیں اور تیل کی برآمدات متاثر ہوئیں، جس کے جواب میں سعودی عرب نے یمن پر فضائی حملے کیے۔

غریب ملک یمن 2014 سے خانہ جنگی کا شکار ہے، جب حوثیوں نے دارالحکومت صنعا سے بین الاقوامی سطح پر تسلیم شدہ سعودی حمایت یافتہ حکومت کو بے دخل کر دیا تھا۔