پی آئی اے بورڈ نے تقرری کا اعلان کرتے ہوئے کہا کہ ہیملٹن مینز قومی ایئرلائن کی جاری تنظیم نو اور تجارتی بنیادوں پر اسے مستحکم بنانے کی کوششوں کی قیادت کریں گے۔

اعلان کے مطابق ہیملٹن مینز کو عالمی ہوا بازی کی صنعت میں 30 سال سے زائد تجربہ حاصل ہے اور وہ تین ایئرلائنز کے چیف ایگزیکٹو رہ چکے ہیں۔ بورڈ نے انہیں ایئرلائنز کی تنظیم نو اور خسارے سے نکالنے کی حکمت عملیوں کا ماہر قرار دیا ہے۔

پی آئی اے میں تقرری سے قبل وہ عمان کی ایئرلائن سلام ایئر کے سربراہ تھے۔ اس سے پہلے انہوں نے اپریل 2020 سے جولائی 2024 تک قازقستان کی فلائی آریستان کے صدر اور سی ای او کے طور پر خدمات انجام دیں۔ وہ 2012 سے 2016 تک افریقی منڈیوں پر توجہ مرکوز کرنے والی کم لاگت ایئرلائن فلائی افریقہ ڈاٹ کام کے بانی سی ای او بھی رہے۔

ان کے پیشہ ورانہ تجربے میں بھارت کی انڈیگو، ساؤتھ افریقن ایئرویز، ورجن آسٹریلیا کی پیسیفک بلیو اور انڈونیشیا کی منڈالا ایئرلائنز میں اعلیٰ تجارتی عہدوں پر کام کرنا بھی شامل ہے۔ انہوں نے 1997 میں ایئر نیوزی لینڈ سے ہوا بازی کے شعبے میں اپنے کیریئر کا آغاز کیا تھا۔

ہیملٹن مینز نے ایئر وائس مارشل (اے وی ایم) عامر حیات کی جگہ ذمہ داریاں سنبھالی ہیں، جو ساڑھے چار سال تک پی آئی اے کے سی ای او رہے۔

پی آئی اے بورڈ نے عامر حیات کی خدمات کو سراہتے ہوئے کہا کہ انہوں نے ادارے میں ساختی اصلاحات متعارف کرانے، آپریشنل کارکردگی بہتر بنانے اور قومی ایئرلائن کو نجکاری کے لیے تیار کرنے میں اہم کردار ادا کیا۔

بورڈ کے چیئرمین نے کہا کہ پیچیدہ عبوری دور میں قومی ایئرلائن کے لیے اے وی ایم عامر حیات کی مستقل خدمات پر وہ ان کے شکر گزار ہیں۔

نئے سی ای او کا خیرمقدم کرتے ہوئے چیئرمین نے اعتماد ظاہر کیا کہ ہیملٹن مینز کا ہوا بازی کا تجربہ ایئرلائن کے اسٹریٹجک اہداف کی تکمیل تیز کرنے، خدمات کا معیار بہتر بنانے اور پائیدار منافع کے حصول میں مددگار ثابت ہوگا۔

یہ تقرری پی آئی اے کے نجی شعبے کے زیرانتظام ایک نئے دور میں داخل ہونے کے موقع پر کی گئی ہے۔ عارف حبیب کی سربراہی میں کنسورشیم نے نجکاری کے عمل کے بعد 29 جون 2026 کو ایئرلائن کا انتظام سنبھالا تھا۔