اس سلسلے میں وفاقی کابینہ کی ہدایات کے بعد پیٹرولیم ڈویژن نے تمام آئل ریفائنریز کو خطوط ارسال کردیے ہیں۔

وفاقی کابینہ نے جمعے کو منظوری دی تھی کہ پیٹرول کی درآمدی قیمت کا تعین پاکستان اسٹیٹ آئل (پی ایس او) کے متعلقہ کارگو کی اصل درآمدی لاگت کی بنیاد پر کیا جاسکتا ہے۔

اگر روزانہ قیمتوں کے تعین کے وقت اصل درآمدی لاگت دستیاب نہ ہو تو آخری دستیاب کارگو کے پریمیم، اضافی اخراجات اور کسٹمز ڈیوٹی کو درآمدی قیمت کے تعین کے لیے استعمال کیا جاسکتا ہے۔

آئل ریفائنریز آئندہ 30 روز کے لیے پیٹرول کی ایکس ریفائنری قیمت 7 مارچ 2026 (جنگ سے قبل) کی سطح پر پریمیم، اضافی اخراجات اور کسٹمز ڈیوٹی مقرر کرکے حاصل کرنے کی مجاز ہوں گی۔

پہلی شق کے تحت مقرر کردہ درآمدی قیمت اور دوسری شق کے تحت طے کردہ ایکس ریفائنری قیمت کے درمیان فرق ریفائنریز کو پیٹرولیم لیوی کے مد میں اکاؤنٹ نمبر C03901 کے تحت سرنڈر کرنا ہوگا۔

پیٹرولیم لیوی میں اس ردوبدل کے نتیجے میں حاصل ہونے والا فائدہ صرف موٹر اسپرٹ (ایم ایس) یعنی پیٹرول کے صارفین کو قیمت میں اسی تناسب سے کمی کے ذریعے منتقل کیا جائے گا۔

اس فیصلے پر عمل درآمد کے لیے تمام ریفائنریز کو ہدایت کی گئی ہے کہ وہ اوگرا کے قیمتوں سے متعلق نوٹیفکیشن اور وقتاً فوقتاً جاری ہونے والے پیٹرولیم لیوی نوٹیفکیشن میں درج تفصیلات کے مطابق اضافی پیٹرولیم لیوی جمع کرائیں۔

ریفائنریز کو مقامی مارکیٹ میں پیٹرول (ایم ایس) کی روزانہ فروخت کی رپورٹس بھی پیٹرولیم ڈویژن اور اوگرا کو جمع کرانا ہوں گی، جن کے ساتھ سی پی آرز اور چالان بھی فراہم کیے جائیں گے تاکہ ضروری تصدیق اور حسابات کی مطابقت کا عمل مکمل کیا جاسکے۔

کاپی رائٹ بزنس ریکارڈر، 2026