اتراکھنڈ سول ایوی ایشن ڈیولپمنٹ اتھارٹی (یو سی اے ڈی اے) کے جاری کردہ بیان کے مطابق ہیلی کاپٹر پہاڑی علاقے میں واقع ہندوؤں کے اہم مذہبی مقام بدری ناتھ سے ریاستی دارالحکومت ڈیرہ دون جا رہا تھا۔

اے این آئی نے یو سی اے ڈی اے کے چیف ایگزیکٹو افسر پرتیک جین کے حوالے سے بتایا کہ ہیلی کاپٹر میں سوار تمام 6 افراد، جن میں پانچ مسافر اور پائلٹ شامل تھے، حادثے میں ہلاک ہوگئے۔

اتھارٹی نے بتایا کہ ’’ہیلی کاپٹر جوشی مٹھ وادی کے اوپر پرواز کے دوران رابطے سے منقطع ہوگیا۔ اسی دوران ٹریکنگ سسٹم بھی اس کی نشاندہی کرنے میں ناکام رہا۔‘‘

بیان میں مزید کہا گیا ہے کہ آپریٹر ٹرانس بھارت ایوی ایشن کے پورے بیڑے کو ’’احتیاطی اقدام کے طور پر‘‘ گراؤنڈ کردیا گیا ہے۔

آپریٹر نے واقعے پر تبصرے کے لیے رائٹرز کی جانب سے بھیجی گئی درخواست کا فوری طور پر جواب نہیں دیا۔

حکام کے مطابق ضلعی انتظامیہ، ڈیزاسٹر مینجمنٹ ٹیموں اور علاقے میں تعینات فوجی اہلکاروں نے مشترکہ طور پر سرچ اینڈ ریسکیو آپریشن کیا۔

ٹی وی چینلز کے مطابق امدادی ٹیمیں حادثے کے مقام پر پہنچ گئی تھیں، جہاں آگ اور دھوئیں کے بادل دکھائی دے رہے تھے۔