لوئر جنوبی وزیرستان کے ڈپٹی کمشنر نے سماجی رابطے کی ویب سائٹ ایکس پر کہا کہ منگل کو ہونے والی ’’بلااشتعال‘‘ فائرنگ کے جواب میں پاکستانی فورسز ’’مؤثر اور بھرپور کارروائی‘‘ کر رہی ہیں۔

افغان طالبان نے دعویٰ کیا کہ پاکستان نے منگل کو صوبہ پکتیکا میں ڈپٹی کمشنر کے دفتر اور قریبی سکیورٹی تنصیبات پر ڈرون کے ذریعے چار حملے کیے۔

افغان وزارتِ دفاع کے ترجمان صدیق اللہ نصرت نے ایک بیان میں دعویٰ کیا کہ افغان فورسز کی جانب سے پاکستان کے ایک قریبی فوجی اڈے پر جوابی کارروائی کے دوران متعدد پاکستانی فوجی جاں بحق یا زخمی ہوئے۔

خبر رساں ادارے رائٹرز ان دعوؤں کی آزادانہ طور پر تصدیق نہیں کر سکا۔

یہ تشدد ایسے وقت میں ہوا ہے جب چند روز قبل افغان طالبان نے کہا تھا کہ پاکستان کے ساتھ مسائل سفارت کاری کے ذریعے حل کیے جا سکتے ہیں۔

پاکستان اور افغانستان کے درمیان شدت پسندی کے معاملے پر اختلافات بڑھتے جا رہے ہیں۔ اسلام آباد کا الزام ہے کہ کابل ایسے شدت پسندوں کو پناہ دے رہا ہے جو سرحد پار حملے کرتے ہیں۔

طالبان حکومت اس الزام کی تردید کرتی ہے اور اس کا کہنا ہے کہ شدت پسندی پاکستان کا اندرونی مسئلہ ہے۔