پیر کو جاری بیان کے مطابق اس حوالے سے وفاقی وزیر تجارت جام کمال خان اور قطر کی کمپنی حساد فوڈ کے چیف ایگزیکٹو علی ہلال الکواری کے درمیان عالمی سرمایہ کاری فورم 2026 کے موقع پر ملاقات ہوئی، جس میں زراعت، غذائی تحفظ، زرعی کاروبار اور زرعی رسدی نظام میں تعاون بڑھانے پر تبادلہ خیال کیا گیا۔

مذاکرات میں دونوں ممالک کے درمیان زرعی تجارت کو مضبوط بنانے، خوراک کی قابلِ اعتماد فراہمی کے انتظامات اور متعلقہ اداروں و کاروباری حلقوں کے درمیان طویل مدتی شراکت داریوں کے قیام پر توجہ دی گئی۔ جام کمال خان نے پاکستان کی زرعی پیداوار کی صلاحیت اجاگر کرتے ہوئے کہا کہ معیاری زرعی مصنوعات اور قابلِ اعتماد رسدی انتظامات کے ذریعے قطر کی غذائی ضروریات پوری کرنے میں مدد دی جا سکتی ہے۔

وفاقی وزیر نے حساد فوڈ کو کراچی میں 23 سے 26 نومبر 2026 تک منعقد ہونے والی فوڈ ایگ 2026 میں شرکت کی دعوت بھی دی، تاکہ قطری سرمایہ کار پاکستانی زرعی پیداوار کنندگان، برآمد کنندگان اور متعلقہ سرکاری اداروں سے براہِ راست رابطہ کر سکیں۔

جام کمال خان نے ترکیہ کے نائب وزیر تجارت مصطفیٰ تزجو سے بھی ملاقات کی، جس میں دوطرفہ تجارت، سرمایہ کاری اور زراعت، توانائی، معدنیات، صنعت اور ٹیکنالوجی کے شعبوں میں تعاون بڑھانے پر گفتگو ہوئی۔ دونوں فریقوں نے تجارتی روابط مضبوط بنانے اور علاقائی رابطہ کاری و راہداریوں کو بہتر بنانے کی اہمیت پر زور دیا۔

قطر بزنس مین ایسوسی ایشن کے چیئرمین شیخ فیصل بن قاسم الثانی سے ملاقات میں بھی کاروباری روابط، انفارمیشن ٹیکنالوجی، رسد، زراعت اور غذائی تحفظ میں تعاون کے امکانات زیرِ بحث آئے۔ جام کمال خان نے پاکستان کی ہنرمند افرادی قوت اور زرعی صلاحیت کو اجاگر کرتے ہوئے قطری سرمایہ کاروں کو پاکستان میں تجارتی اور سرمایہ کاری کے مواقع تلاش کرنے کی دعوت دی۔

فریقین نے دوطرفہ تجارت بڑھانے، کاروباری برادریوں کے براہِ راست روابط کو فروغ دینے اور زرعی و غذائی شعبے میں باہمی فائدے کی شراکت داریوں کے لیے مسلسل رابطے برقرار رکھنے پر اتفاق کیا۔