ذرائع کے مطابق نئے معاہدے کے تحت پارکو کی جانب سے پی ایس او کو آر او این 92 پٹرول کی ماہانہ فراہمی 18 ہزار ٹن سے بڑھا کر 50 ہزار ٹن اور ہائی اسپیڈ ڈیزل کی فراہمی 50 ہزار ٹن سے بڑھا کر ایک لاکھ 5 ہزار ٹن کردی جائے گی۔ اس کے برعکس فرنس آئل کی ماہانہ فراہمی 32 ہزار ٹن سے کم کرکے 5 ہزار ٹن کرنے کی تجویز ہے۔

معاہدہ دستخط کی تاریخ سے پانچ سال تک مؤثر رہے گا اور اس کا مقصد مقامی ریفائنری سے پیٹرولیم مصنوعات کی دستیابی بہتر بنانے، رسد کے تحفظ کو مضبوط کرنے اور قیمتوں، ادائیگیوں، معیار اور پیمائش سے متعلق تجارتی شرائط کو جدید تقاضوں سے ہم آہنگ کرنا ہے۔

دونوں کمپنیوں کے درمیان 10 سالہ بنیادی معاہدہ یکم اگست 2011 کو طے پایا تھا، جو 31 جولائی 2021 کو ختم ہوگیا۔ تاہم پارکو نے نئے معاہدے پر دستخط ہونے تک سابقہ معاہدے اور اس کے تین اضافوں کو مؤثر رکھنے کی تصدیق کی تھی تاکہ فراہمی کا تسلسل برقرار رہے۔

ذرائع کے مطابق سپلائی کوآرڈینیشن کمیٹی نے 26 جنوری 2026 کو معاہدے کی تجدید کی سفارش کی، جبکہ مینجمنٹ کمیٹی نے 23 فروری 2026 کو اس کی منظوری دی۔ بعد ازاں 26 مارچ 2026 کو انتظامیہ نے پارکو اور اٹک ریفائنری کے معاہدوں کی حتمی منظوری کے لیے بورڈ سے رجوع کرنے کی ہدایت کی۔

نئے معاہدے کے تحت آر او این 92 اور آر او این 95 پٹرول یورو فائیو معیار کے مطابق ہوں گے، جبکہ ادائیگیوں کے لیے ناقابل تنسیخ لیٹر آف کریڈٹ یا مقررہ تاریخ پر براہ راست ادائیگی کی سہولت بھی فراہم کی جائے گی۔

فرنس آئل کی سالانہ خریداری 3 لاکھ 84 ہزار ٹن سے کم کرکے 60 ہزار ٹن کرنے سے پی ایس او کو کم ہوتی طلب کے باعث سرمایہ غیر ضروری طور پر پھنسانے سے بچنے میں مدد ملنے کی توقع ہے۔ پٹرول اور ڈیزل کی مقامی فراہمی بڑھنے سے درآمدات اور سمندری مال برداری پر انحصار بھی کم ہوسکتا ہے۔

کاپی رائٹ بزنس ریکارڈر، 2026