صدرمحمد معیزو وزیراعظم شہباز شریف کی دعوت پر پاکستان آئیں گے۔ دفتر خارجہ کے مطابق ان کے ہمراہ خاتونِ اول ساجدہ محمد، کابینہ کے وزرا اور اعلیٰ حکام پر مشتمل ایک اعلیٰ سطح کا وفد بھی ہوگا۔

دورے کے دوران مالدیپ کے صدر پاکستان کے صدر آصف علی زرداری سے ملاقات کریں گے، جو ان کے اعزاز میں سرکاری ضیافت بھی دیں گے۔ صدر معیزو وزیراعظم شہباز شریف کے ساتھ محدود سطح اور وفود کی سطح پر مذاکرات بھی کریں گے۔

دونوں رہنما دوطرفہ تعلقات کے تمام پہلوؤں کا جائزہ لیں گے اور تجارت، سرمایہ کاری، صحت، تعلیم، سیاحت، زراعت، دفاع، بحری سلامتی، ماحولیاتی تبدیلی اور عوامی روابط سمیت مختلف شعبوں میں تعاون بڑھانے کے طریقوں پر تبادلہ خیال کریں گے۔ اس کے علاوہ باہمی دلچسپی کے علاقائی اور عالمی امور پر بھی تبادلہ خیال ہوگا۔

دورے کے دوران پاکستان اور مالدیپ کا کاروباری فورم بھی منعقد کیا جائے گا، جس کا مقصد دونوں ممالک کی کاروباری برادریوں کے درمیان روابط بڑھانا اور تجارت و سرمایہ کاری کے نئے مواقع تلاش کرنا ہے۔

دفتر خارجہ کے مطابق دوطرفہ تعاون کے مختلف شعبوں میں متعدد معاہدوں اور مفاہمت کی یادداشتوں پر دستخط بھی متوقع ہیں۔

دفتر خارجہ نے کہا کہ یہ دورہ اس لحاظ سے خصوصی اہمیت کا حامل ہے کہ دونوں ممالک 1966 میں سفارتی تعلقات کے قیام کی 60ویں سالگرہ منا رہے ہیں۔

بیان میں مزید کہا گیا کہ پاکستان اور مالدیپ کے تعلقات مشترکہ مذہبی وابستگی، باہمی احترام، دیرینہ خیرسگالی اور علاقائی و عالمی فورمز پر قریبی تعاون پر استوار ہیں۔

دفتر خارجہ کے مطابق یہ دورہ دونوں ممالک کے درمیان شراکت داری کو مزید مضبوط بنانے اور باہمی مفاد میں تعاون کے نئے راستے کھولنے کے مشترکہ عزم کا عکاس ہے۔