جدید بیٹری ٹیکنالوجی، ہائبرڈ انورٹرز، قابلِ توسیع توانائی ذخیرہ کرنے کے نظام اور برقی نقل و حرکت سے متعلق حل متعارف کرا کر آئی ٹیل انرجی کا مقصد پاکستان میں قابلِ اعتماد، مؤثر اور لچکدار توانائی کے حل کی بڑھتی طلب پوری کرنا اور مارکیٹ میں اپنی پوزیشن مزید مستحکم بنانا ہے۔

قابلِ تجدید توانائی کی بڑھتی ہوئی طلب سے فائدہ اٹھانے کے لیے کمپنی نے کراچی میں منعقدہ 22ویں سولر پاکستان ایکسپو میں اپنے جدید شمسی توانائی اور توانائی ذخیرہ کرنے کے حل پیش کیے۔ پاکستان میں توانائی ذخیرہ کرنے کی مارکیٹ تیزی سے ترقی کر رہی ہے، جہاں بیٹریوں کی قیمتوں میں کمی کے باعث گھریلو صارفین اور کاروباری ادارے شمسی توانائی کے ساتھ بیٹری اسٹوریج سسٹم اپنانے میں بڑھتی ہوئی دلچسپی لے رہے ہیں۔

کمپنی نے گھریلو استعمال کے لیے اپنی نئی جنریشن ٹو (Gen-2) بیٹری رینج متعارف کرانے کے ساتھ ساتھ REPT BATTERO کے ساتھ تزویراتی تعاون کو بھی اجاگر کیا۔ اس کے علاوہ، آئی ٹیل انرجی نے تجارتی و صنعتی شعبوں میں توانائی ذخیرہ کرنے کے حل کی فراہمی بڑھانے کے منصوبوں کا اعلان کیا۔

گھریلو صارفین کے لیے متعارف کرائی گئی نئی نسل کی بیٹریاں 2.5 کلوواٹ اور 5 کلوواٹ کی گنجائش میں دستیاب ہیں۔ ان میں REPT کی رائل سیریز کے 100 فیصد گریڈ اے سیلز اور جدید بیٹری مینجمنٹ سسٹم شامل ہیں جنہیں بیٹریوں کی کارکردگی، تحفظ اور عملی عمر بہتر بنانے کے لیے تیار کیا گیا ہے۔

گھریلو استعمال سے آگے بڑھتے ہوئے کمپنی نے تجارتی و صنعتی شعبے کے لیے مخصوص توانائی کے حل تیار کرنے کی غرض سے تزویراتی شراکت داروں کے ساتھ مفاہمتی یادداشت پر دستخط کرنے کا اعلان بھی کیا۔ اس منصوبے میں کمپنی کی نئی نسل کی 10 کلو واٹ آور گنجائش کی C&I بیٹری اہم کردار ادا کرے گی۔ گریڈ اے سیلز سے لیس یہ بیٹری قابلِ توسیع توانائی ذخیرہ کرنے کے نظاموں کے لیے تیار کی گئی ہے۔

مجوزہ حل کے تحت منصوبوں کی تکمیل سے متعلق خدمات بھی فراہم کی جائیں گی جن میں توانائی کا آڈٹ، تنصیب اور نگرانی شامل ہیں۔ اس کے ساتھ اے آئی پر مبنی توانائی مینجمنٹ سسٹم بھی متعارف کرایا جائے گا جس کا مقصد بجلی کے استعمال کو مؤثر بنانا اور زیادہ طلب کے اوقات میں بجلی کے اخراجات کم کرنا ہے۔

گھریلو اور صنعتی شعبوں کے لیے توانائی کے حل کے علاوہ آئی ٹیل انرجی نے اپنے وسیع تر پاور سیریز ایکو سسٹم کو بھی پیش کیا۔ اس کے تحت مشترکہ مارکیٹنگ کے اقدامات کے ذریعے پورٹیبل پاور اسٹیشنز، الیکٹرک بائیکس اور اسمارٹ فونز کو ایک مربوط نظام کا حصہ بنایا جا رہا ہے۔

کمپنی کے مطابق اس حکمتِ عملی کا مقصد پورٹیبل توانائی اور برقی نقل و حرکت سمیت توانائی سے متعلق جدید حل کو صارفین کی روزمرہ ضروریات سے ہم آہنگ کرنا اور پاکستان میں توانائی کے متبادل ذرائع کے فروغ میں اپنا کردار ادا کرنا ہے۔