خواجہ آصف نے ایکس پر جاری بیان میں پاکستان تحریک انصاف (پی ٹی آئی) کی زیرقیادت صوبائی حکومت پر دہشت گردی کے معاملے سے ’’مکمل لاتعلقی‘‘ کا الزام عائد کیا اور وزیراعلیٰ سہیل آفریدی اور ان کی کابینہ کو سکیورٹی صورتحال کے بجائے سیاسی لانگ مارچ پر توجہ مرکوز کرنے پر تنقید کا نشانہ بنایا۔

وزیر دفاع خواجہ آصف نے کہا کہ ’’خیبر پختونخوا کے عوام کا بہت خون بہہ چکا ہے‘‘، اور صوبائی حکومت اور دہشت گردوں کے درمیان ’’مکمل گٹھ جوڑ‘‘ کا الزام عائد کیا۔

انہوں نے 6 اکتوبر کو ڈیرہ اسماعیل خان میں ہونے والے حملے کا حوالہ دیا، جس میں کسٹمز کے دو اہلکاروں سمیت 5 افراد جاں بحق ہوئے، اور صوبائی حکومت کو واقعے کی مذمت نہ کرنے اور متاثرہ خاندانوں سے تعزیت نہ کرنے پر تنقید کا نشانہ بنایا۔

خواجہ آصف نے یہ الزام بھی عائد کیا کہ وزیراعلیٰ نے رات گئے اجلاس طلب کیا تھا تاکہ گورنر کی جانب سے بلائے گئے سکیورٹی اجلاس میں شرکت کرنے پر انسپکٹر جنرل پولیس اور چیف سیکریٹری کو ڈانٹ سکیں۔

انہوں نے کہا، ’’اب وقت آگیا ہے کہ اہم فیصلے کیے جائیں۔ خیبر پختونخوا کو مزید نااہل، بے حس حکمرانوں اور طالبان کے حامیوں کے رحم و کرم پر نہیں چھوڑا جاسکتا۔‘‘

وزیر دفاع نے مزید خبردار کیا کہ ملک کے اتحاد کو خطرے میں نہیں ڈالا جاسکتا اور پورے صوبے کو یرغمال نہیں بنایا جاسکتا۔

پی ٹی آئی حکومت کے دور کا موازنہ کرتے ہوئے خواجہ آصف نے کہا کہ پاکستان مسلم لیگ (ن) کی قیادت نے جیلیں کاٹیں، تاہم پارلیمانی کردار جاری رکھا اور سیاسی تنازعات کو آئینی و قانونی فورمز پر حل کرنے کی کوشش کی۔

انہوں نے پی ٹی آئی پر ملک اور اداروں کو ’’یرغمال‘‘ بنانے کا الزام عائد کیا اور کہا کہ اس نے طالبان کے ساتھ اتحاد کیا۔

خواجہ آصف نے کہا، ’’بس بہت ہوگیا۔‘‘