تفصیلات کے مطابق بدھ کو بھارتی مرکزی بینک نے اپنی بینچ مارک ریپو شرح 25 بیسس پوائنٹس بڑھا کر 5.5 فیصد کردی جو بڑھتی ہوئی مہنگائی اور مضبوط معاشی نمو کے درمیان تقریباً چار سال میں شرح سود میں پہلا اضافہ ہے۔

ایران جنگ کے نتیجے میں تیل کی قیمتوں میں اضافے سے مہنگائی بڑھنے، عوام کی قوتِ خرید متاثر ہونے اور کرنسیوں پر دباؤ پڑنے کے باعث بھارت بھی شرح سود بڑھانے والے بڑے مرکزی بینکوں میں شامل ہوگیا ہے۔

ال نینو سے منسلک کمزور مون سون بارشوں نے ایشیا کی تیسری بڑی معیشت میں قیمتوں کے دباؤ کو مزید بڑھا دیا ہے۔

شرح سود کے تعین کے لیے قائم 6 رکنی پینل نے متفقہ طور پر شرح سود میں اضافے کے حق میں ووٹ دیا۔

گورنر سنجے ملہوترا نے زری پالیسی سے متعلق خطاب میں کہا کہ یہ بات واضح ہے کہ مہنگائی کے حوالے سے منظرنامہ اب سازگار نہیں رہا۔

رائٹرز کے ایک سروے میں تقریباً 60 فیصد ماہرین اقتصادیات نے ریپو ریٹ میں 25 بیسس پوائنٹس اضافے کی توقع ظاہر کی تھی۔

اگست میں صارف قیمتوں کی مہنگائی ایک سال پہلے کے مقابلے میں بڑھ کر 4.82 فیصد ہوگئی جو مسلسل تیسرے ماہ بھارتی ریزرو بینک کے درمیانی مدت کے 4 فیصد ہدف سے زیادہ رہی۔

ایندھن اور اشیائے خورونوش کی بلند قیمتوں کے اثرات اب معیشت کے دیگر شعبوں تک بھی پہنچ رہے ہیں جبکہ صارفین کی اشیا و خدمات کی ٹوکری کے تقریباً نصف حصے میں مہنگائی 4 فیصد سے زیادہ ہوگئی ہے۔

دوسری جانب معاشی نمو بدستور مضبوط ہے جس سے مرکزی بینک کو صارفین اور کاروباری اداروں کے لیے قرض لینے کی لاگت بڑھانے کی زیادہ گنجائش مل رہی ہے۔

اپریل تا جون سہ ماہی میں جی ڈی پی کی شرح نمو 7.8 فیصد رہی جو مرکزی بینک کی 7 فیصد کی پیش گوئی سے خاصی زیادہ ہے۔