یہ اعداد و شمار وزیراعظم کی زیر صدارت اسکیم پر پیش رفت کا جائزہ لینے کے لیے منعقدہ اجلاس میں پیش کیے گئے۔ اسکیم کے تحت موٹر سائیکلوں، رکشوں اور 800 سی سی تک انجن رکھنے والی گاڑیوں کے مالکان کو ایندھن پر سبسڈی فراہم کی جارہی ہے۔

اجلاس میں بریفنگ کے دوران بتایا گیا کہ اسکیم کے آغاز سے اب تک ایندھن سبسڈی کے 1 کروڑ 22 لاکھ ٹوکن جاری کیے جاچکے ہیں، جن میں سے 1 کروڑ 3 لاکھ استعمال کیے گئے ہیں۔

اجلاس کو بتایا گیا کہ اسکیم تیسرے ہفتے میں داخل ہوگئی ہے اور جن شہریوں نے پہلے یا دوسرے ہفتے میں سبسڈی حاصل کی تھی، وہ اگلی ہفتہ وار سبسڈی حاصل کرنے کے اہل ہوگئے ہیں۔

بریفنگ کے مطابق پروگرام ملک کے 129 اضلاع میں نافذ کیا جارہا ہے اور تمام پیٹرول پمپس اسکیم کے تحت شہریوں کو سہولت فراہم کررہے ہیں۔

شہریوں اور پیٹرول پمپ مالکان کی رہنمائی کے لیے 24 گھنٹے کال سینٹر قائم کیا گیا ہے، جبکہ وزیراعظم آفس کا پبلک افیئرز یونٹ اور منتخب نمائندے بھی رجسٹریشن کے عمل میں شہریوں کی معاونت کررہے ہیں۔

وزیراعظم نے اسکیم پر عملدرآمد کا جائزہ لیتے ہوئے بڑھتی ہوئی پیٹرولیم قیمتوں کے تناظر میں کم آمدنی والے اور متوسط طبقے کے گھرانوں کو ریلیف فراہم کرنے کے حکومتی عزم کا اعادہ کیا۔

انہوں نے کہا کہ حکومت کے بروقت اقدامات سے شہری مختصر مدت میں فیول سبسڈی سے مستفید ہوسکے ہیں۔ وزیراعظم نے اسکیم سے مستفید ہونے والے افراد کی تعداد پر اطمینان کا اظہار کرتے ہوئے پروگرام پر عملدرآمد کرنے والی حکومتی ٹیم کی کارکردگی کو سراہا۔

انہوں نے نائب وزیراعظم و وزیر خارجہ اسحاق ڈار، وزیر خزانہ محمد اورنگزیب، وزیر پیٹرولیم علی پرویز ملک، وزیر آئی ٹی شزہ فاطمہ، وزیر اطلاعات عطا اللہ تارڑ، وزیر اقتصادی امور احد چیمہ، آئل اینڈ گیس ریگولیٹری اتھارٹی (اوگرا) اور اسکیم سے وابستہ تمام وفاقی و صوبائی حکام کی کوششوں کو بھی سراہا۔

وزیراعظم نے کہا کہ فیول سبسڈی پروگرام کے ذریعے تیار کیا جانے والا ڈیٹا بیس مستقبل میں بھی شہریوں کی معاونت کے لیے استعمال کیا جائے گا۔

اجلاس میں اسحاق ڈار، محمد اورنگزیب، احد چیمہ، عطا اللہ تارڑ، شزہ فاطمہ، وزیر مملکت برائے خزانہ بلال کیانی، وزیراعظم کے معاون خصوصی طارق باجوہ اور متعلقہ اداروں کے اعلیٰ حکام نے شرکت کی۔

کاپی رائٹ بزنس ریکارڈر، 2026