سرکاری بیان کے مطابق یہ پیش رفت برآمد کنندگان کے تین رکنی وفد اور جنید انور چوہدری کے درمیان ہونے والی ملاقات کے دوران سامنے آئی۔

ملاقات کے دوران وفد نے وفاقی وزیر کو خطے میں شپنگ روٹس میں تبدیلی کے باعث پیدا ہونے والی مشکلات سے آگاہ کیا اور بتایا کہ طویل راستوں کے باعث یورپی اور امریکی منڈیوں تک مال کی ترسیل کے اخراجات اور دورانیے میں اضافہ ہوگیا ہے۔

وفد میں اسٹائل ٹیکسٹائل کے چیف ایگزیکٹو آفیسر شہزاد اصغر علی، گلوبل ایڈیڈاس کے نائب صدر بینیڈکٹ برنر اور ایڈیڈاس میں سورسنگ آپریشنز کے سینئر ڈائریکٹر ثاقب رفیق شامل تھے۔ بیان کے مطابق پی این ایس سی کے چیف ایگزیکٹو آفیسر سید جرار حیدر کاظمی نے بھی آن لائن اجلاس میں شرکت کی۔

برآمد کنندگان نے کہا کہ طویل شپنگ روٹس کے باعث پاکستانی برآمد کنندگان کو علاقائی حریفوں کے مقابلے میں مشکلات کا سامنا ہے، کیونکہ دیگر ممالک کے برآمد کنندگان کو اہم عالمی منڈیوں تک نسبتاً آسان اور براہِ راست رسائی حاصل ہے۔

جنید انور چوہدری نے شپنگ رابطوں کو بہتر بنانے اور عالمی منڈیوں تک رسائی میں سہولت فراہم کرنے کے اقدامات کا جائزہ لینے کے لیے وزارتِ بحری امور، پی این ایس سی اور برآمد کنندگان کے نمائندوں پر مشتمل ورکنگ گروپ تشکیل دے دیا۔

شرکاء نے نقل و حمل کے اخراجات کم کرنے اور برآمدی رابطوں کو بہتر بنانے کے لیے مختص کنٹینر جہاز کی تجویز سمیت دیگر اقدامات کی فزیبلٹی کا جائزہ لینے پر اتفاق کیا۔

وفد نے کہا کہ وہ دیگر برآمد کنندگان سے مشاورت کے بعد اپنی تجاویز غور کے لیے ورکنگ گروپ کے سامنے پیش کرے گا۔

ورکنگ گروپ شپنگ رابطوں کو بہتر بنانے، نقل و حمل کے اخراجات کم کرنے اور پاکستانی برآمدات کو عالمی منڈیوں تک رسائی میں سہولت فراہم کرنے کے لیے ممکنہ انتظامات کا بھی جائزہ لے گا۔