اجلاس کی صدارت ایس سی او کے لیے پاکستان کے قومی رابطہ کار کریں گے، جبکہ ایس سی او کے رکن ممالک کے قومی رابطہ کاروں کے علاوہ تنظیم کے سیکریٹریٹ کے نمائندے بھی اجلاس میں شرکت کریں گے۔

قومی رابطہ کار ایس سی او کے تعاون اور رابطہ کاری سے متعلق مختلف امور پر تبادلہ خیال کریں گے، جن میں پاکستان کی صدارت کے دوران سرگرمیوں کے پروگرام، ایس سی او کے آئندہ اجلاسوں اور تقریبات کی تیاریوں سمیت تنظیم کے ایجنڈے پر موجود دیگر معاملات شامل ہیں۔

پاکستان نے ’’تصور کو عمل میں بدلنا: رابطہ کاری، جدت اور مشترکہ خوشحالی‘‘ کے عنوان کے تحت 2026-27 کے لیے ایس سی او کی سربراہانِ مملکت کونسل (سی ایچ ایس) کی صدارت سنبھالی ہے۔

وزارت خارجہ کے مطابق پاکستان کی صدارت کے دوران زیادہ سے زیادہ رابطہ کاری کے فروغ، جدت طرازی کی حوصلہ افزائی، اقتصادی تعاون میں اضافے اور عوامی سطح پر روابط مضبوط بنانے پر توجہ دی جائے گی۔

وزارت خارجہ نے کہا کہ پاکستان ان ترجیحات کو آگے بڑھانے اور تنظیم کے اندر تعاون کو مزید مضبوط بنانے کے لیے ایس سی او کے تمام رکن ممالک اور ایس سی او سیکریٹریٹ کے ساتھ مل کر کام کرے گا۔

قومی رابطہ کاروں کی کونسل کا اجلاس پاکستان کی صدارت کے تحت پہلی بڑی سرگرمی ہوگی اور صدارت کے دوران ہونے والے مختلف اعلیٰ سطح اجلاسوں اور سرگرمیوں کی تیاری میں معاون ثابت ہوگا۔

وزارت خارجہ کے مطابق ان میں ایس سی او سربراہانِ مملکت کونسل کا اجلاس بھی شامل ہے، جس کی میزبانی پاکستان اگست 2027 میں کرے گا۔