وزیراعظم آفس کے مطابق وزیراعظم شہباز شریف نے پاکستان کی معیشت کے لیے آئی ایم ایف کی مسلسل حمایت کو سراہا اور آئی ایم ایف کے تعاون سے جاری اصلاحاتی پروگرام پر کامیاب عملدرآمد کے لیے اپنی حکومت کے غیر متزلزل عزم کا اعادہ کیا۔

دریں اثنا، کرسٹالینا جارجیوا نے ایکس پر اپنی پوسٹ میں کہا کہ انہوں نے وزیراعظم سے پاکستان میں جاری اصلاحات پر تبادلہ خیال کیا۔ انہوں نے کہا کہ اصلاحات پر مضبوط عملدرآمد نے استحکام برقرار رکھنے، اعتماد بحال کرنے اور مارکیٹ تک دوبارہ رسائی حاصل کرنے میں مدد دی ہے۔ مسلسل اصلاحات سے ترقی میں اضافہ اور عوام کے معیار زندگی میں بہتری آئے گی۔

وزیراعظم کے بیان کے مطابق شہباز شریف نے پاکستان اور آئی ایم ایف کے درمیان تعمیری شراکت داری کو مضبوط بنانے میں منیجنگ ڈائریکٹر کے کردار کو خصوصی طور پر سراہا۔

بیان میں کہا گیا کہ وزیراعظم نے اقتصادی اصلاحات کے ایجنڈے پر حکومت کی مکمل ملکیت کا اعادہ کیا اور اصلاحات کی رفتار برقرار رکھنے اور معیشت کو مضبوط بنانے، پائیدار اور جامع ترقی کی بنیاد رکھنے کے لیے ساختی اقدامات آگے بڑھانے کے عزم کا اظہار کیا۔

وزیراعظم نے مزید کہا کہ علاقائی تنازعات اور بیرونی افراط زر کے دباؤ کے باوجود پاکستان محتاط مالی اور زری پالیسیوں کی مدد سے معاشی استحکام سے بحالی کی جانب کامیابی سے منتقل ہو رہا ہے۔

انہوں نے مالیاتی نظم و ضبط، بیرونی مالیاتی ذخائر اور سرمایہ کاروں کے اعتماد میں بہتری کو اجاگر کیا۔ وزیراعظم نے قومی ٹیرف نظام، ملکی محصولات میں اضافے اور نجکاری کے عمل میں پیش رفت کو پاکستان کی معاشی کوششوں کی مثالیں قرار دیا۔

وزیراعظم نے اصلاحات کے عمل کو جاری رکھتے ہوئے معاشرے کے کمزور طبقات کے تحفظ کے لیے حکومت کے عزم پر بھی زور دیا۔

وزیراعظم آفس کے مطابق منیجنگ ڈائریکٹر کرسٹالینا جارجیوا نے آئی ایم ایف پروگرام کے تحت پاکستان کی کارکردگی اور معاشی استحکام کے لیے حکومت کی کوششوں کو سراہا، جن کے نتیجے میں ٹھوس نتائج سامنے آ رہے ہیں۔

دونوں رہنماؤں نے پاکستان کے آئندہ آئی ایم ایف پروگرام جائزے اور اصلاحات کو آگے بڑھانے، معاشی لچک مضبوط بنانے اور پائیدار ترقی کے فروغ کے لیے پاکستان اور آئی ایم ایف کے درمیان مسلسل تعاون پر بھی تبادلہ خیال کیا۔

نائب وزیراعظم و وزیر خارجہ سینیٹر محمد اسحاق ڈار، وزیر خزانہ محمد اورنگزیب، مشیر برائے نجکاری محمد علی، معاون خصوصی برائے وزیراعظم طارق فاطمی اور دیگر اعلیٰ حکام بھی ملاقات میں موجود تھے۔