نیویارک میں ڈیجیٹل کوآپریشن آرگنائزیشن کے اعلیٰ سطحی وزارتی مکالمے سے خطاب کرتے ہوئے وزیر خزانہ نے ڈیجیٹل عوامی بنیادی ڈھانچے کی ترقی اور کیش لیس ادائیگی کے نظام کو وسعت دینے کی اہمیت اجاگر کی۔

81ویں اقوام متحدہ کی جنرل اسمبلی کے اجلاس میں شرکت کے لیے نیویارک میں موجود اورنگزیب نے کہا کہ پاکستان کا ڈیجیٹل تبدیلی کا ایجنڈا محض رابطے کے نظام تک محدود نہیں ہونا چاہیے بلکہ اس میں جامع مہارتوں کے فروغ اور نئی مہارتیں سیکھنے کے پروگرام بھی شامل ہونے چاہئیں۔

انہوں نے کہا کہ ڈیجیٹل مہارتوں میں اضافے سے فری لانسرز اور دیگر ڈیجیٹل کارکن زیادہ قدر والی خدمات کی جانب منتقل ہوسکتے ہیں، جس سے ملک کی ڈیجیٹل معیشت کو مضبوط بنانے میں مدد ملے گی۔

وزیر خزانہ نے ورچوئل اثاثوں کے بڑھتے ہوئے استعمال اور قانون سازی، نگرانی اور لائسنسنگ پر مشتمل موزوں ضابطہ جاتی نظام وضع کرنے کے لیے پاکستان کی کوششوں پر بھی بات کی۔

انہوں نے زور دیا کہ ورچوئل اثاثوں کی صلاحیت محض کرپٹو کرنسی تک محدود نہیں، بلکہ انہیں سستی اور زیادہ سہل ترسیلاتِ زر کے لیے بھی استعمال کیا جاسکتا ہے۔

اورنگزیب نے سرکاری قرض اور رئیل اسٹیٹ سمیت مختلف شعبوں میں ٹوکنائزیشن کے امکانات کو بھی اجاگر کیا اور کہا کہ ابھرتی ہوئی ڈیجیٹل ٹیکنالوجیز مالیاتی جدت کے لیے نئے راستے کھول سکتی ہیں۔

انہوں نے ڈی سی او کے رکن ممالک کے درمیان تعاون بڑھانے، کامیاب تجربات کے تبادلے، پالیسی طریقۂ کار شیئر کرنے اور ڈیجیٹل معیشت میں سرمایہ کاری کو فروغ دینے پر زور دیا۔

وزیر خزانہ کی ڈی سی او مکالمے میں شرکت ایسے وقت میں ہوئی ہے جب پاکستان اپنے ڈیجیٹل بنیادی ڈھانچے کو مضبوط بنانے اور وسیع تر معاشی ترقی کی حکمت عملی کے تحت ٹیکنالوجی سے فائدہ اٹھانے کی کوشش کر رہا ہے۔