یہ پیش رفت پاکستان میں ترکیہ کے سفیر ڈاکٹر عرفان نذیراوغلو اور وفاقی وزیر برائے توانائی (پاور ڈویژن) سردار اویس احمد خان لغاری کے درمیان جمعہ کو ہونے والی ملاقات میں سامنے آئی۔

ملاقات میں بجلی کے شعبے میں جاری اصلاحات، ڈسکوز کی نجکاری کے عمل پر پیش رفت، ترک سرمایہ کاری میں دلچسپی اور توانائی کے شعبے میں پاکستان اور ترکیہ کے درمیان تعاون مزید مضبوط بنانے کے اقدامات کا جائزہ لیا گیا۔

اویس لغاری نے کہا کہ پاور ڈویژن نے ڈسکوز کی نجکاری کے لیے درکار پالیسی، اصلاحاتی اور ادارہ جاتی کام مکمل کر لیا ہے، جبکہ باضابطہ عمل متعلقہ فورم اور نجکاری کمیشن کے ذریعے آگے بڑھایا جا رہا ہے۔

انہوں نے کہا کہ حکومت بجلی کی تقسیم کے نظام کی کارکردگی بہتر بنانے، مالیاتی پائیداری اور بہتر طرز حکمرانی یقینی بنانے اور مؤثر نجی شعبے کی شمولیت کے ذریعے خدمات کی فراہمی بہتر بنانے کے لیے جامع اصلاحات پر عمل پیرا ہے۔

وفاقی وزیر نے کہا کہ پاکستان اور ترکیہ کے درمیان توانائی کے شعبے میں تعاون مضبوط بنیادوں پر قائم ہے۔ انہوں نے بتایا کہ ترکیہ کے دورے کے دوران دونوں ممالک کے توانائی کے شعبے کے اہم اداروں کے درمیان طے پانے والی تین مفاہمت کی یادداشتوں (ایم او یوز) نے بجلی کی منڈیوں، ترسیل اور تقسیم کے شعبوں میں ادارہ جاتی تعاون کے لیے ایک فریم ورک فراہم کیا ہے۔

اویس لغاری نے ڈسکوز کی نجکاری کے عمل میں ترک کمپنیوں کی دلچسپی کا خیرمقدم کرتے ہوئے کہا کہ توانائی کے شعبے میں ان کا تجربہ اور مہارت پاکستان میں بجلی کے شعبے کی اصلاحات میں نمایاں کردار ادا کر سکتی ہے۔

انہوں نے ترک سرمایہ کاروں کو پاکستان کے پاور سیکٹر میں سرمایہ کاری کے مواقع تلاش کرنے کی دعوت بھی دی اور کہا کہ دوطرفہ تعاون اب تجربات کے تبادلے سے آگے بڑھ کر مضبوط ادارہ جاتی روابط، تکنیکی تعاون اور نئی سرمایہ کاری کی جانب گامزن ہے۔

ترک سفیر نے پاکستان میں جاری بجلی کے شعبے کی اصلاحات اور نجی شعبے کی شمولیت کے فروغ کے لیے کیے جانے والے اقدامات کو سراہا۔

انہوں نے کہا کہ ترک کمپنیوں کی پاکستان کے توانائی کے شعبے میں سرمایہ کاری کے مواقع میں گہری دلچسپی ہے اور ڈسکوز کی نجکاری کے عمل میں ان کی شمولیت دونوں ممالک کے درمیان اقتصادی تعلقات کو مزید مضبوط کرے گی۔

سفیر نے پاکستان اور ترکیہ کے درمیان ادارہ جاتی تعاون کو فروغ دینے اور متعلقہ ترک کمپنیوں اور اداروں کے ساتھ روابط مضبوط بنانے کے عزم کا بھی اعادہ کیا۔

ملاقات کے اختتام پر توانائی کے شعبے میں اصلاحات، سرمایہ کاری، تکنیکی تعاون اور نجی شعبے کی شمولیت کے حوالے سے تعاون مزید بڑھانے کے عزم کا اظہار کیا گیا۔