وزیراعظم آفس نے بتایا کہ ملاقات میں نائب وزیراعظم و وزیر خارجہ محمد اسحاق ڈار، وزیر داخلہ سید محسن رضا نقوی، وزیر ہاؤسنگ ریاض حسین پیرزادہ اور وزیر مملکت برائے داخلہ طلال چوہدری بھی موجود تھے۔

وزیراعظم نے لبنانی وزیر کا خیرمقدم کرتے ہوئے دونوں ممالک کے درمیان دیرینہ برادرانہ تعلقات کی اہمیت پر زور دیا اور لبنانی قیادت کے لیے نیک خواہشات کا اظہار کیا۔

ملاقات میں پاکستان اور لبنان کے درمیان دوطرفہ تعلقات اور باہمی تعاون کا جائزہ لیا گیا، جبکہ دونوں جانب سے داخلی امور اور سکیورٹی کے شعبوں میں بڑھتے ہوئے تعاون پر اطمینان کا اظہار کیا گیا۔

وزیراعظم نے لبنان پر اسرائیلی جارحیت کی شدید مذمت کرتے ہوئے اسرائیلی حملوں کے نتیجے میں قیمتی انسانی جانوں اور املاک کے نقصان پر گہرے دکھ اور افسوس کا اظہار کیا۔

انہوں نے مشکل وقت میں پاکستانی حکومت اور عوام کی جانب سے لبنانی قیادت اور عوام کے ساتھ مکمل یکجہتی کا اعادہ کیا اور لبنان کی خودمختاری اور علاقائی سالمیت کے لیے پاکستان کی مسلسل حمایت کا یقین دلایا۔

لبنان کے وزیر داخلہ نے پرتپاک استقبال پر وزیراعظم کا شکریہ ادا کیا اور پاکستان کے ساتھ دوطرفہ تعاون مزید مضبوط بنانے کے لیے لبنان کے عزم کا اعادہ کیا۔

بعد ازاں وزیراعظم نے پاکستان اور لبنان کے درمیان سزا یافتہ افراد کی منتقلی سے متعلق مفاہمتی یادداشت پر دستخط کی تقریب میں شرکت کی، جس پر دونوں ممالک کے وزرائے داخلہ نے دستخط کیے۔ وزیراعظم آفس کے مطابق مفاہمتی یادداشت کے تحت سزا یافتہ شہریوں کو اپنی باقی ماندہ سزا اپنے وطن میں پوری کرنے کے لیے قانونی طریقہ کار فراہم کیا گیا ہے۔