وفاقی وزیر نے اسلام آباد میں وزیراعظم شہباز شریف کی جانب سے متعارف کرائی گئی نئی پٹرول ریلیف اسکیم کے حوالے سے صحافیوں کو بریفنگ دیتے ہوئے کہا کہ وسائل کی کمی کے باوجود حکومت نے معاشرے کے کمزور طبقات کو تحفظ فراہم کرنے کی کوشش کی ہے۔ اس موقع پر وفاقی وزیر اطلاعات و نشریات عطا تارڑ اور وزیر مملکت برائے انفارمیشن ٹیکنالوجی شزہ فاطمہ خواجہ بھی موجود تھیں۔

شزہ فاطمہ نے کہا کہ وزیراعظم کی فیول ریلیف اسکیم سے زیادہ سے زیادہ مستحق افراد کو فائدہ پہنچانے کے لیے کم سے کم جانچ پڑتال کے ساتھ رجسٹریشن کا آسان طریقہ متعارف کرایا گیا ہے۔

انہوں نے کہا کہ اسکیم کا ہدف موٹر سائیکلوں، رکشوں اور 800 سی سی تک انجن رکھنے والی گاڑیوں کے صارفین ہیں۔ اسکیم کے تحت اہل افراد کو فی لیٹر پٹرول پر 100 روپے کی سبسڈی دی جائے گی۔

رجسٹریشن کے طریقہ کار کی تفصیلات بتاتے ہوئے وفاقی وزیر آئی ٹی نے کہا کہ اہل افراد گھر بیٹھے اپنا شناختی کارڈ نمبر، گاڑی کا نمبر، صوبے کے نام کا پہلا حرف اور گاڑی کی رجسٹریشن کی تاریخ ایس ایم ایس کے ذریعے 9771 پر بھیج کر رجسٹریشن کراسکتے ہیں۔ انہوں نے کہا کہ اس کے بعد رجسٹریشن کا عمل مکمل ہوجائے گا۔

انہوں نے کہا کہ پٹرول پمپ جانے سے پہلے رجسٹرڈ مستحقین کو فیول ریلیف ٹوکن حاصل کرنے کے لیے 9771 پر TOK بھیجنا ہوگا۔ پٹرول پمپ ٹوکن نمبر دیکھنے کے بعد سبسڈی والا پٹرول فراہم کرے گا۔

شزہ فاطمہ نے کہا کہ موٹر سائیکل صارفین ہفتے میں ایک بار جبکہ گاڑیوں کے صارفین ہر 10 دن بعد پٹرول سبسڈی حاصل کرسکیں گے۔ ان کے مطابق سبسڈی گاڑیوں کے لیے 10 لیٹر اور موٹر سائیکلوں کے لیے 5 لیٹر پٹرول کے ٹوکن کے ذریعے فراہم کی جائے گی۔

وزیر اطلاعات نے کہا کہ فیول ریلیف اسکیم موجودہ صورتحال میں مستحق افراد کا مالی بوجھ کم کرنے کے لیے شروع کی گئی ہے۔ انہوں نے کہا کہ اسکیم کے بارے میں زیادہ سے زیادہ آگاہی یقینی بنانے کے لیے تمام ممکنہ ذرائع استعمال کیے جائیں گے۔