بدھ کو گلیشیئر گرنے کے نتیجے میں آنے والے تباہ کن سیلاب سے نیپال میں 547 افراد جبکہ چین کے تبت میں 5 افراد ہلاک ہوئے، جبکہ دونوں ممالک میں تقریباً 1,000 افراد لاپتا ہیں۔ گلیشیئر گرنے کے بعد چٹانوں، برف، کیچڑ اور ملبے کا بڑا ریلا دریاؤں میں داخل ہوا، جس سے ایک جھیل بھی بن گئی اور اس میں پانی کی سطح مسلسل بلند ہوتی رہی۔

جمعہ کو جھیل میں پانی کا ذخیرہ بڑھ کر 25 لاکھ مکعب میٹر ہوگیا، جو ایک روز قبل 15 سے 20 لاکھ مکعب میٹر تھا۔ پانی کے اضافی بہاؤ سے نیپال میں خوف و ہراس پھیل گیا اور امدادی کارروائیاں تقریباً تین گھنٹے کے لیے روک دی گئیں۔ تاہم پانی کی سطح میں صرف تقریباً دو فٹ اضافے کے بعد خطرہ کم ہونے پر کارروائیاں دوبارہ شروع کردی گئیں۔

سیلاب نے دیہات اور وادیوں کو شدید نقصان پہنچایا اور کٹھمنڈو کو تبت کے لہاسا سے ملانے والی سڑک، پلوں اور بجلی گھروں کو تباہ کردیا۔ ریڈ کراس کے مطابق 90 ہزار سے زائد افراد متاثر ہوئے ہیں۔

چین نے گلیشیئر جھیلوں، لینڈ سلائیڈنگ اور قدرتی رکاوٹوں سے بننے والی جھیلوں کی نگرانی مزید مضبوط بنانے کی ہدایت کی ہے۔ دریں اثنا لاپتا افراد کے اہل خانہ اپنے پیاروں کی خبر کے لیے بے قرار ہیں۔ نیپال نے غیر ملکی امدادی ٹیموں کی پیشکش کے باوجود کہا ہے کہ اسے تلاش اور امدادی کارروائیوں میں بیرونی مدد کی ضرورت نہیں۔