پاور ڈویژن کے مطابق نیپرا نے گزشتہ ہفتے پاور انفارمیشن ٹیکنالوجی کمپنی (پی آئی ٹی سی) کو ڈسکوز اور کے الیکٹرک میں زیرِ التوا نیٹ میٹرنگ کنکشنز کی جانچ پڑتال اور ریکارڈ اپ ڈیٹ کرنے کی ذمہ داری سونپی تھی۔

پاور ڈویژن نے بتایا کہ ریگولیٹری ہدایت خاص طور پر ان نیٹ میٹرنگ کنکشنز سے متعلق ہے جو صارفین کی جانب سے 9 فروری 2026 سے قبل ڈیمانڈ نوٹس کی ادائیگی، نیٹ میٹرنگ لائسنس کے حصول، میٹر کی فزیکل تبدیلی یا ری پروگرامنگ اور میٹر کنکشن آرڈر پر عمل درآمد کے باوجود زیرِ التوا ہیں۔

ڈویژن نے کہا کہ ایسے کیسز کی حیثیت کا انحصار اس بات پر ہوگا کہ صارفین نے ریگولیٹر کی مقررہ تاریخ 9 فروری سے قبل ڈیمانڈ نوٹس کی قابلِ تصدیق ادائیگی کی تھی یا نہیں۔

پاور ڈویژن نے بتایا کہ تمام بجلی تقسیم کار کمپنیوں اور پی آئی ٹی سی کو زیرِ التوا درخواستوں کی مکمل جانچ پڑتال کی ہدایت کی گئی ہے، جس میں خاص طور پر 9 فروری کی مقررہ تاریخ سے قبل ڈیمانڈ نوٹس کی قابلِ تصدیق ادائیگی کو مدنظر رکھا جائے گا۔

ڈویژن نے کہا، ”جن صارفین نے مقررہ تقاضے مکمل کرلیے ہیں، جن میں ڈیمانڈ نوٹس کی بروقت ادائیگی بھی شامل ہے، انہیں یقین دلایا جاتا ہے کہ انہیں غیر ضروری رکاوٹوں یا ضابطے کی کارروائی میں تاخیر کا سامنا نہیں کرنا پڑے گا۔“

پی آئی ٹی سی کو خصوصی طور پر ہدایت کی گئی ہے کہ وہ اپنے بلنگ سسٹمز اور سافٹ ویئر کا جائزہ لے تاکہ 9 فروری 2026 سے قبل تمام مطلوبہ کارروائیاں مکمل کرنے والے کنکشنز کا ریکارڈ فوری طور پر اپ ڈیٹ کرکے انہیں نظام میں شامل کیا جاسکے۔ پاور ڈویژن کے مطابق اہل صارفین کو نظرانداز ہونے سے بچانے کے لیے یہ تکنیکی اقدام انتہائی اہم ہے۔

پاور ڈویژن کے مطابق تصدیق کا یہ عمل رکاوٹیں پیدا کرنے کے لیے نہیں بلکہ نیپرا کی ہدایات پر درست اور منصفانہ انداز میں عمل درآمد یقینی بنانے کے لیے کیا جارہا ہے۔

ڈویژن نے کہا، ”مقصد صارفین کے حقوق کا تحفظ کرتے ہوئے صرف حقیقی زیرِ التوا کیسز کو تیزی سے نمٹانا ہے۔“