حکام کے مطابق ہفتے کی صبح آنے والے زلزلے کے بعد 341 آفٹر شاکس ریکارڈ کیے گئے، جس سے متعدد علاقوں میں لینڈ سلائیڈنگ ہوئی، سڑکیں بند ہوگئیں اور امدادی سرگرمیوں میں مشکلات پیش آئیں۔ قدرتی آفات سے نمٹنے والے ادارے (بی این پی بی) کے مطابق 1,300 سے زائد مکانات کو نقصان پہنچا، جبکہ سیکڑوں افراد اب بھی ملبے تلے دبے ہونے کا خدشہ ہے۔

سِکا اور بندرگاہی شہر ماؤمیری میں ہزاروں افراد کھلے آسمان تلے یا عارضی خیموں میں رات گزارنے پر مجبور ہوئے۔ مقامی حکام کا کہنا ہے کہ بیشتر شہری خوف کے باعث گھروں میں واپس جانے سے گریز کر رہے ہیں۔

حکومت نے امدادی کارروائیوں کے لیے 3,500 سے زائد فوجی اور پولیس اہلکار تعینات کر دیے ہیں۔ ریسکیو ٹیموں نے لینڈ سلائیڈنگ سے بند ہونے والے کئی راستے کھول دیے ہیں، تاہم متاثرہ علاقوں تک رسائی اب بھی ایک بڑا چیلنج ہے۔

حکام کے مطابق بجلی کی بندش کے باعث 20 پیٹرول پمپ بھی بند ہیں، جبکہ صوبائی حکومت ہنگامی حالت نافذ کرنے پر غور کر رہی ہے تاکہ مزید وسائل اور فنڈز فوری طور پر فراہم کیے جا سکیں۔

انڈونیشیا بحرالکاہل کے رِنگ آف فائر میں واقع ہے، جہاں ٹیکٹونک پلیٹوں کی سرگرمی کے باعث زلزلے اور آتش فشانی واقعات اکثر پیش آتے رہتے ہیں۔