ای وائے نے رواں سال برطانوی معاشی ترقی کی پیشگوئی معمولی بہتر کرتے ہوئے اسے 0.8 فیصد کر دیا ہے،۔ یہ اندازہ اس مفروضے پر مبنی ہے کہ آبنائے ہرمز ستمبر کے اختتام تک دوبارہ کھول دی جائے گی۔ اس صورت میں فرم نے 2027 میں برطانوی معیشت کی شرح نمو 1.2 فیصد رہنے کی توقع ظاہر کی ہے۔

ای وائے یو کے کے چیف اکانومسٹ پیٹر آرنلڈ نے کہا کہ اگر آنے والے مہینوں میں آبنائے ہرمز دوبارہ کھل جاتی ہے تو برطانیہ زیادہ شدید معاشی مندی سے بچ سکتا ہے، لیکن اگر یہ بندش 2027 تک جاری رہی تو مہنگائی میں اضافہ ہوگا اور اگلے سال معیشت سکڑ سکتی ہے۔

ای وائے کے مطابق اگر آبنائے ہرمز 2027 کے آغاز یا وسط تک بند رہتی ہے تو رواں سال برطانیہ کی معاشی ترقی کم ہو کر 0.5 فیصد رہ جائے گی، جبکہ 2027 میں معیشت 0.2 فیصد سکڑ سکتی ہے۔

اس صورتحال میں 2026 کے اختتام تک مہنگائی بڑھ کر 6.4 فیصد تک پہنچنے کا امکان ہے، جبکہ اگر آبنائے ہرمز اگلے چند ماہ میں کھل جاتی ہے تو مہنگائی کی بلند ترین سطح صرف 3.5 فیصد تک رہنے کی توقع ہے۔

دوسری جانب بینک آف انگلینڈ کی گزشتہ ہفتے جاری کردہ پیشگوئی میں ایک منفی منظرنامے کے تحت، جہاں تیل اور گیس کی قیمتیں مارکیٹ کی توقعات سے 30 سے 60 فیصد زیادہ رہیں، اگلے سال بھی معیشت کی تقریباً 1 فیصد شرح نمو ظاہر کی گئی تھی، جبکہ سہ ماہی بنیاد پر مہنگائی کی بلند ترین سطح 4.5 فیصد تک پہنچنے کا امکان بتایا گیا تھا۔

ای وائے کا اندازہ ہے کہ بینک آف انگلینڈ رواں سال شرح سود کو موجودہ سطح پر برقرار رکھے گا، جبکہ اگلے سال اسے 3.75 فیصد سے کم کر کے 3.25 فیصد کر سکتا ہے۔ اس حوالے سے اپریل اور جولائی میں شرح سود میں کمی متوقع ہے۔