جاپانی وزیراعظم ثناء تاکایچی نے ہنگامی صورتحال کا اعلان کرتے ہوئے شہریوں کو محفوظ مقامات پر منتقل ہونے کی ہدایت کی ہے۔ تباہ کاریوں سے نمٹنے اور امدادی فعالیت کے لیے 3,600 فوجیوں کو متحرک کر دیا گیا ہے جبکہ 3 لاکھ افراد کو اپنا گھر بار چھوڑ کر امدادی کیمپوں میں منتقل ہونے کا حکم دیا گیا ہے۔زلزلے کے فوراً بعد شاپنگ مال میں ہونے والے دھماکے اور عمارت گرنے سے کئی افراد کی ہلاکتوں کا خدشہ ظاہر کیا جا رہا ہے۔ این ایچ کے کے مطابق 50 سے زائد زخمیوں کو اسپتال منتقل کیا جا چکا ہے۔ زلزلے کے شدید جھٹکوں کے باعث بلٹ ٹرین سروس معطل، کوماموٹو ایئرپورٹ کا رن وے بند اور ٹیلی مواصلات کا نظام متاثر ہوا ہے۔ دنیا کی سب سے بڑی چپ ساز کمپنی ٹی ایس ایم سی اور سونی نے اپنے کارخانوں سے عملے کو محفوظ جگہوں پر منتقل کر دیا ہے۔

جاپانی محکمہ موسمیات کے مطابق سونامی کی ابتدائی وارننگ اب واپس لے لی گئی ہے، تاہم اگلے ایک ہفتے تک مزید شدید آفٹر شاکس کا خطرہ برقرار رہے گا۔ نیوکلیئر اتھارٹی کا کہنا ہے کہ خطے کے ایٹمی پاور پلانٹس بالکل محفوظ ہیں اور وہاں کسی قسم کی غیر معمولی صورتحال کی اطلاع نہیں۔