امریکہ نے جمعہ کو 60 تجارتی شراکت داروں سے درآمد ہونے والی اشیا پر نئے ٹیرف نافذ کیے تھے۔ واشنگٹن کا مؤقف ہے کہ یہ ممالک جبری مشقت سے تیار کی جانے والی مصنوعات کی تجارت روکنے میں ناکام رہے ہیں۔ یہ اقدام ایسے وقت میں کیا گیا جب دنیا بھر پر عائد عارضی 10 فیصد ٹیرف کی مدت ختم ہو گئی۔

وزیراعظم البانیز کی قیادت میں آسٹریلوی لیبر حکومت نے ان ٹیرف کو غیر منصفانہ اور بلاجواز قرار دیتے ہوئے مطالبہ کیا ہے کہ انہیں واپس لیا جائے۔

اتوار کو جب البانیز سے پوچھا گیا کہ کیا وہ اس معاملے پر صدر ٹرمپ سے بات کریں گے، تو انہوں نے جواب دیا، بالکل۔

انہوں نے ٹیلی ویژن پر نشر ہونے والے اپنے بیان میں کہا کہ ہم آسٹریلیا اور امریکہ کے تعلقات کے ہر سطح پر یہ معاملہ اٹھائیں گے، اور ہم پہلے بھی ایسا کر چکے ہیں۔

البانیز نے کہا کہ آسٹریلیا میں جدید غلامی کے خلاف پہلے ہی سخت قوانین موجود ہیں، اور حکومت انہیں مزید مؤثر بنا رہی ہے۔ ان کے مطابق سپلائی چین کی نگرانی مزید مضبوط کی جا رہی ہے تاکہ خلاف ورزی کرنے والوں پر بھاری جرمانے اور سزائیں عائد کی جا سکیں۔