مودی نے سوشل میڈیا پر جاری بیان میں کہا کہ نوجوانوں کی فلاح اور مستقبل سے بڑھ کر کوئی چیز اہم نہیں۔ انہوں نے وعدہ کیا کہ امتحانی پرچوں کے لیک میں ملوث افراد کے خلاف مقدمات چلانے کے لیے فاسٹ ٹریک عدالتیں قائم کی جائیں گی۔

ادھر سوشل میڈیا سے ابھرنے والی کاکروچ جنتا پارٹی کی قیادت میں ہزاروں طلبہ نے بدھ کو نئی دہلی میں احتجاج کیا، جہاں پولیس اور مظاہرین کے درمیان جھڑپیں بھی ہوئیں۔ مظاہرین گزشتہ ماہ سے وزیر تعلیم کے استعفے کا مطالبہ کر رہے ہیں۔

پیر کو پارلیمنٹ کی جانب مارچ کرنے والے مظاہرین پر پولیس کی آنسو گیس اور لاٹھی چارج کے بعد احتجاج مزید شدت اختیار کر گیا، جبکہ بعض مظاہرین نے پتھراؤ بھی کیا۔ پولیس کے مطابق جھڑپوں میں سیکیورٹی اہلکاروں سمیت 178 افراد زخمی ہوئے۔

امتحانی نظام میں بار بار بے ضابطگیوں، خصوصاً میڈیکل انٹری ٹیسٹ کے پرچے کے لیک ہونے اور تقریباً 20 لاکھ طلبہ کو دوبارہ امتحان دینے پر مجبور کیے جانے کے بعد عوامی غصہ بڑھ گیا ہے۔ اپوزیشن رہنما راہول گاندھی نے بھی مودی کے استعفے کا مطالبہ کیا، جس کے بعد انہیں حراست میں لے لیا گیا۔