ٹی پی ایل انشورنس نے منگل کو پاکستان اسٹاک ایکسچینج کو بھیجے گئے ایک نوٹس میں اس پیشرفت سے آگاہ کیا۔

کمپنی نے کہا کہ ہمیں یہ اطلاع دیتے ہوئے خوشی ہورہی ہے کہ یہ لین دین اب کامیابی کے ساتھ مکمل ہوچکا ہے۔

کمپنی نے مزید کہا کہ چنانچہ 13 جولائی 2026 سے خریدار اور ٹی پی ایل کارپ لمیٹڈ کے درمیان طے پانے والے شیئر پرچیز معاہدے اور متعلقہ قوانین کے تحت لازمی ٹینڈر آفر کے مطابق، خریدار نے کمپنی کے جاری شدہ شیئر سرمایہ کا 76.33 فیصد حصہ اور کمپنی کا کنٹرول حاصل کرلیا ہے جبکہ متعلقہ حصص باقاعدہ طور پر خریدار کے نام منتقل کر دیے گئے ہیں۔

ٹی پی ایل انشورنس نے کہا کہ اس لین دین کی کامیاب تکمیل کمپنی کے سفر میں ایک اہم سنگِ میل کی حیثیت رکھتی ہے اور اس کے ساتھ ہی کمپنی کے لیے ایک نئے باب کا آغاز ہو گیا ہے۔

کمپنی نے مزید کہا کہ جاز اور ویون کے ایکو سسٹم کا حصہ بننے کے بعد توقع ہے کہ کمپنی کو بہتر ڈیجیٹل صلاحیتوں، وسیع تر ڈسٹری بیوشن چینلز اور پاکستان میں جدید، ٹیکنالوجی پر مبنی انشورنس حل مزید لوگوں تک پہنچانے کے بہتر مواقع حاصل ہوں گے۔

ویون اور جاز ورلڈ نے ٹی پی ایل انشورنس کو اپنے گروپ میں شامل ہونے پر خوش آمدید کہا۔

اس خریداری کے ذریعے ویون نے پاکستان میں اپنے مربوط ڈیجیٹل ایکو سسٹم کے تحت جاز کیش اور موبی لنک بینک کے ساتھ انشورنس کو بھی شامل کرتے ہوئے اپنی ڈیجیٹل مالی خدمات کے پورٹ فولیو کو مزید وسعت دے دی ہے۔

ویون کے چیف ایگزیکٹو آفیسر اور جاز ورلڈ کے بورڈ آف ڈائریکٹرز کے چیئرمین کان ترزی اوغلو نے کہا کہ انشورنس ڈیجیٹل مالیاتی شمولیت کا اگلا اہم مرحلہ ہے۔

انہوں نے کہا کہ یہ خریداری مربوط ڈیجیٹل آپریٹر ایکو سسٹمز کی تعمیر کی ہماری حکمتِ عملی کو مزید مضبوط بناتی ہے جس کے ذریعے ہم صارفین کو روزمرہ زندگی میں حقیقی اور مؤثر سہولیات فراہم کرتے ہوئے اپنے شیئر ہولڈرز کے لیے پائیدار طویل مدتی ترقی کو یقینی بنانا چاہتے ہیں۔

جاز ورلڈ کے چیف ایگزیکٹو آفیسر عامر ابراہیم نے کہا کہ اس خریداری کی تکمیل کے ساتھ ہی جاز ورلڈ نے پاکستان کا سب سے جامع ڈیجیٹل مالیاتی خدمات کا ایکو سسٹم قائم کرنے کی جانب ایک اہم قدم اٹھا لیا ہے۔

“پاکستان دنیا کی ان مارکیٹوں میں سے ایک ہے جہاں انشورنس کی سہولت سب سے کم ہے اور یہاں انشورنس کا پھیلاؤ جی ڈی پی کے 1 فیصد سے بھی کم ہے۔ ٹی پی ایل انشورنس کی انڈر رائٹنگ کی مہارت اور ڈیجیٹل صلاحیتوں کو اپنے ایکو سسٹم کی پہنچ، ڈیٹا بصیرت اور ڈسٹری بیوشن کے وسیع پیمانے کے ساتھ ملا کر ہم ایمبیڈڈ انشورنس میں جدت لانے اور ملک بھر کے صارفین اور کاروبار کے لیے سستی انشورنس مصنوعات تک رسائی کو وسیع کرنے کے لیے بہترین پوزیشن میں ہیں۔

ٹی پی ایل کارپ کے چیف ایگزیکٹو آفیسر علی جمیل نے کہا کہ ٹی پی ایل انشورنس ایک ہی یقین کے ساتھ قائم کی گئی تھی کہ ٹیکنالوجی کے ذریعے پاکستان کے ہر شہری کے لیے، چاہے وہ کہیں بھی رہتا ہو یا اس کی آمدنی کا ذریعہ کچھ بھی ہو، انشورنس کو قابلِ رسائی بنایا جا سکتا ہے۔ ہمیں اپنی ٹیم کی ان کامیابیوں پر فخر ہے جن میں ڈیجیٹل پلیٹ فارم، جدید مصنوعات اور صارفین کے ساتھ مضبوط تعلقات شامل ہیں جو اس کاروبار کی بنیاد ہیں۔

گزشتہ سال ستمبر میں ویون گروپ ہولڈنگ کمپنی لمیٹڈ نے ٹی پی ایل انشورنس کے حصص اور کمپنی کا کنٹرول حاصل کرنے کے اپنے ارادے کا اظہار کیا تھا۔

بعد ازاں دسمبر 2025 میں جاز انٹرنیشنل ہولڈنگ لمیٹڈ کو باضابطہ طور پر نیا خریدار قرار دیا گیا جس نے ویون گروپ ہولڈنگ کمپنی لمیٹڈ اور اس سے منسلک اداروں کی جگہ لے لی۔

مارچ میں ٹی پی ایل کارپ لمیٹڈ نے جاز انٹرنیشنل ہولڈنگ لمیٹڈ کے ساتھ ٹی پی ایل انشورنس کے حصص کی فروخت اور کمپنی کا کنٹرول منتقل کرنے کے لیے شیئر پرچیز ایگریمنٹ پر دستخط کیے۔

اس معاہدے کے تحت جاز انٹرنیشنل ہولڈنگ لمیٹڈ نے تقریباً 4.15 ارب روپے کے عوض ٹی پی ایل انشورنس میں کنٹرولنگ حصص خریدنے پر اتفاق کیا تھا۔

سیکیورٹیز اینڈ ایکسچینج کمیشن آف پاکستان نے فروری 2026 میں اس خریداری کی منظوری دیتے ہوئے کہا تھا کہ ڈیجیٹل انشورنس کمپنی اور ایک بڑے ڈیجیٹل آپریٹر کے درمیان یہ شراکت داری پاکستان میں انشورنس کی رسائی بڑھانے اور غیر ملکی سرمایہ کاری میں اضافے کا باعث بننے کی توقع ہے۔