آج جاری ہونے والے ایک بیان میں پی اے اے نے کہا کہ پاکستان نیوی (پی این) اور پاکستان میری ٹائم سیکیورٹی ایجنسی (پی ایم ایس اے) کی جانب سے گہرے سمندر میں تلاش اور بچاؤ (ایس اے آر) کے مشنز جاری ہیں۔ بیان میں مزید کہا گیا کہ فضائی اور بحری وسائل کے مربوط استعمال کے ذریعے عملے کے ارکان کی تلاش پوری تندہی کے ساتھ جاری ہے۔

اس سے قبل منگل کی رات شارجہ سے کراچی آنے والے ایک کارگو طیارے (بوئنگ 737) کا، جس پر عملے کے پانچ ارکان سوار تھے اور جو پاکستان میں رجسٹرڈ تھا، نیویگیشن سسٹم میں خرابی کی اطلاع دینے کے بعد ایئر ٹریفک کنٹرول سے رابطہ منقطع ہو گیا تھا، جس کے بعد پاکستان کی ہوا بازی کے حکام نے تلاش اور بچاؤ کی کارروائیاں شروع کر دیں۔ پاکستان ایئرپورٹس اتھارٹی نے فیس بک پر بتایا کہ کے ٹو ایئرویز کا یہ 27 سال پرانا طیارہ کراچی کی طرف پرواز کے دوران پاکستانی وقت کے مطابق رات 9 بج کر 18 منٹ (1618 جی ایم ٹی) پر نیویگیشن سسٹم کی خرابی کا شکار ہوا تھا۔

یہ طیارہ بلوچستان میں اورماڑہ کے قریب بحیرہ عرب کے اوپر پرواز کرتے ہوئے لاپتہ ہوا تھا۔ بدھ کو پاکستان ایئرپورٹس اتھارٹی نے بتایا تھا کہ لاپتہ کے ٹو طیارے کا ملبہ اورماڑہ سے تقریباً 53 ناٹیکل میل جنوب میں برآمد کر لیا گیا ہے۔