بھارتی ذرائع کے مطابق تقریباً 630 ملین ڈالر مالیت کے اس دفاعی معاہدے پر مودی کے دورے کے دوران دستخط کیے جانے کا امکان ہے۔ معاہدے کے بعد انڈونیشیا براہموس میزائل خریدنے والا تیسرا ملک بن جائے گا۔ یہ میزائل براہموس ایرو اسپیس پرائیویٹ لمیٹڈ تیار کرتی ہے، جو بھارت اور روس کا مشترکہ منصوبہ ہے۔

تجزیہ کاروں کے مطابق یہ معاہدہ بھارت کی دفاعی برآمدات میں نمایاں اضافہ کرے گا اور جنوب مشرقی ایشیا کی سب سے بڑی معیشت انڈونیشیا کے ساتھ اس کے اسٹریٹجک تعلقات کو مزید مضبوط بنائے گا، خصوصاً ایسے وقت میں جب بحرِ ہند و بحرالکاہل (انڈو پیسیفک) خطے میں چین اور بھارت کے درمیان اثر و رسوخ کی مسابقت بڑھ رہی ہے۔

براہموس دنیا کے تیز ترین کروز میزائلوں میں شمار ہوتا ہے اور اسے زمین، سمندر اور فضائی پلیٹ فارمز سے داغا جا سکتا ہے، جبکہ آسٹرا میزائل انڈونیشیائی فضائیہ کے روسی ساختہ سخوئی لڑاکا طیاروں پر نصب کیے جا سکیں گے۔

بھارتی ذرائع کے مطابق وزیراعظم نریندر مودی اپنے دورے کے دوران انڈونیشیا کے صدر پرابوو سوبیانتو سے ملاقات کریں گے، جس میں بحری سلامتی، دفاعی صنعتی تعاون، علاقائی روابط اور انڈو پیسیفک میں اسٹریٹجک تعاون پر تبادلہ خیال ہوگا۔

زیر غور پیکیج میں میزائل سسٹمز کے علاوہ معاون انفراسٹرکچر، آپریٹرز کی تربیت، دیکھ بھال کی سہولیات اور طویل المدتی تکنیکی معاونت بھی شامل ہے۔

یاد رہے کہ بھارت اس سے قبل ویتنام اور فلپائن کے ساتھ بھی براہموس میزائل کی فروخت کے معاہدے کر چکا ہے، جبکہ متحدہ عرب امارات سمیت کئی دیگر ممالک نے بھی اس نظام میں دلچسپی ظاہر کی ہے۔