اسٹیٹ بینک کے مطابق مارکیٹ کے اختتام پر مقامی کرنسی ڈالر کے مقابلے میں 1 پیسے کے معمولی اضافے کے ساتھ 278.11 روپے پر بند ہوئی۔

یاد رہے کہ جمعہ کو روپیہ 278.12 روپے پر بند ہوا تھا۔

وزیرِ خزانہ محمد اورنگزیب نے کہا ہے کہ حکومت ڈیجیٹل انویسٹمنٹ پلیٹ فارمز کے ذریعے سرکاری سیکیورٹیز تک رسائی کو وسیع کر کے فنانسنگ کے لیے کمرشل بینکوں پر اپنا انحصار بتدریج کم کرنے کا ارادہ رکھتی ہے۔ اسٹیٹ بینک آف پاکستان کے انویسٹ پاک پورٹل کے اجراء کی تقریب سے خطاب کرتے ہوئے محمد اورنگزیب نے اس پورٹل کو ”سرمایہ کاری کے ایک نئے دور کا آغاز“ قرار دیا۔

مرکزی بینک نے انویسٹ پاک پورٹل کو ایک ڈیجیٹل انویسٹمنٹ پلیٹ فارم کے طور پر متعارف کرایا ہے جس کا مقصد انفرادی اور کارپوریٹ دونوں طرح کے سرمایہ کاروں کے لیے سرکاری سیکیورٹیز میں سرمایہ کاری کے عمل کو آسان اور ڈیجیٹل بنانا ہے۔ وزیرِ خزانہ نے مزید کہا کہ پاکستان کی ڈیجیٹل تبدیلی کو تیز کرنے کے ساتھ ساتھ حکومت کے سرمایہ کاروں کے دائرہ کار کو متنوع بنانا ایک اہم پالیسی ہدف ہے۔

بین الاقوامی مارکیٹ میں پیر کو امریکی ڈالر دو ہفتے کی کم ترین سطح کے قریب مستحکم رہا کیونکہ سرمایہ کاروں نے اس سال فیڈرل ریزرو کی جانب سے شرحِ سود میں اضافے کی توقعات کو کم کر دیا ہے، جبکہ ین 40 سال کی کم ترین سطح کے قریب موجود ہے جس کی وجہ سے سرمایہ کار اس تشویش میں مبتلا ہیں کہ ٹوکیو اگلا کیا قدم اٹھا سکتا ہے۔ یورو 1.1435 ڈالر پر رہا جو دو ہفتوں میں اس کی مضبوط ترین سطح کے قریب ہے، جبکہ برطانوی پاؤنڈ کی قیمت 1.3351 ڈالر رہی۔ چھ اہم کرنسیوں کے مقابلے میں امریکی ڈالر کی قدر ناپنے والا ڈالر انڈیکس ابتدائی تجارت میں 100.9 پر تھا۔

ین کی قیمت 161.57 فی امریکی ڈالر ریکارڈ کی گئی، جو گزشتہ ہفتے کی 1986 کے بعد کی کم ترین سطح 162.84 کے بالکل قریب ہے، کیونکہ تاجر جمعرات کو اچانک خریداری میں اضافے کے بعد ممکنہ حکومتی مداخلت کے خوف سے اب بھی تذبذب کا شکار ہیں۔ دوسری جانب جنوبی کوریائی وان میں اپنی تاریخی 24 گھنٹے کی آن شور اسپاٹ ڈالر وان ٹریڈنگ کے پہلے دن معمولی بہتری دیکھی گئی اور یہ 1,534 فی ڈالر پر ٹریڈ ہو رہا تھا۔

اوپیک پلس کی جانب سے اگست سے پیداواری اہداف میں مزید اضافے کے معاہدے اور اہم پیداواری ممالک کی طرف سے آبنائے ہرمز کے ذریعے سپلائی کی بحالی کے بعد پیر کو تیل کی قیمتوں میں کمی دیکھی گئی، جس سے عالمی منڈی میں رسد بڑھنے کا امکان ہے۔ گرینچ کے معیاری وقت کے مطابق صبح 09:42 بجے برینٹ خام تیل کے سودے 41 سینٹ یا 0.57 فیصد کمی کے ساتھ 71.71 ڈالر فی بیرل پر آ گئے، جبکہ جمعہ کو اس کی قیمت 0.45 فیصد اضافے کے ساتھ بند ہوئی تھی۔ امریکی ویسٹ ٹیکساس انٹرمیڈیٹ خام تیل کی قیمت 37 سینٹ یا 0.54 فیصد کی گراوٹ کے ساتھ 68.32 ڈالر فی بیرل ریکارڈ کی گئی۔ ہفتے کو یومِ آزادی کی تعطیل کے باعث جمعہ کو امریکی مارکیٹیں بند تھیں، جس کی وجہ سے جمعہ کو ڈبلیو ٹی آئی کی حتمی قیمت طے نہیں ہو سکی تھی۔