سرکاری بیان کے مطابق اس خریداری کی منظوری اصولی طور پر ڈیفنس ایکوزیشن کونسل نے دی جو اعلیٰ فوجی حکام پر مشتمل ادارہ ہے اور جس کی سربراہی وزیر دفاع کرتے ہیں۔

بیان کے مطابق اس دفاعی سودے کی تخمینہ لاگت تقریباً 520 ارب بھارتی روپے (5.46 ارب امریکی ڈالر) ہوگی۔

بیان میں یہ نہیں بتایا گیا کہ یہ دفاعی خریداری کس مدت میں مکمل کی جائے گی، نہ ہی یہ واضح کیا گیا کہ منظور شدہ سسٹمز درآمد کیے جائیں گے یا مقامی طور پر تیار کیے جائیں گے۔

نئی دہلی گزشتہ ایک دہائی سے اپنے روایتی اور بڑے دفاعی سپلائر روس پر انحصار کم کرنے کی حکمتِ عملی پر عمل پیرا ہے۔ اس مقصد کے لیے اس نے امریکہ اور فرانس سمیت دیگر ممالک سے دفاعی تعاون بڑھانے کے ساتھ ساتھ مقامی دفاعی پیداوار کو بھی فروغ دیا ہے۔

حکومت کے مطابق اس سودے میں بھارتی فوج کے لیے اینٹی ڈرون اور الیکٹرانک وارفیئر سسٹمز، درمیانی فاصلے تک مار کرنے والے زمین سے فضا میں مار کرنے والے میزائل، پورٹیبل اینٹی ٹینک میزائل اور جیٹ بیسڈ کامیکازے ڈرون سسٹم کی خریداری شامل ہے۔